ریاض: سعودی عرب کے 2 خلا باز آج خلائی سفر کے لیے روانہ ہوجائیں گے جس کے بعد سعودی عرب خلائی میدان میں بھی تاریخ رقم کردے گا۔
اردو نیوز کے مطابق سعودی سپیس اتھارٹی خلائی سفر پر جانے والے دنوں خلا بازوں کی تیاری آخری مرحلے میں ہے، اتوار 21 مئی کو انہیں خلائی اسٹیشن پہنچا دیا جائے گا۔
بین الاقوامی خلائی اسٹیشن (آئی ایس ایس) پر جانے والوں میں پہلی سعودی خلا باز خاتون ریانہ برناوی اور علی القرنی شامل ہیں۔
21 مئی کو دونوں سعودی خلا باز ماہرین کی ایک ٹیم کے ساتھ انٹرنیشنل خلائی اسٹیشن کے لیے روانہ ہوں گے جہاں سے ان کے خلائی سفر کا آغاز ہوگا۔
سعودی سپیس اتھارٹی کا کہنا ہے کہ خلائی سفرکا پروگرام 22 ستمبر 2022 کو جاری کیا گیا تھا، گروپ میں شامل خلا باز مختلف سائنسی تجربات کریں گے جومائیکرو گریوٹی پر مشتمل ہیں۔
اتھارٹی نے بیان میں مزید کہا کہ دونوں سعودی خلا باز فالکن 9 نام راکٹ کے ذریعے اپنے خلائی سفر کا آغاز کریں گے۔
قبل ازیں میڈیا سے گفتگو میں سعودی خلا بازوں ریانہ برناوی اور علی القرنی نے تاریخی خلائی مشن کا حصہ بننے پر جوش اور فخر کا اظہار کیا تھا، ان کا کہنا تھا کہ وہ 21 مئی کو مقررہ وقت پر بین الاقوامی خلائی اسٹیشن جانے والے خلائی مشن کے لیے پوری طرح سے تیار ہیں۔
