کراچی : سعودی عرب نے عازمین حج کیلئے امیگریشن لینڈنگ کارڈ کی شرائط ختم کردیں، سعودی ایوی ایشن اتھارٹی نے حجاج کی سہولت کیلیے پاکستان سمیت دنیا بھر کی تمام ایئر لائنز کو ہدایت جاری کردی۔
تفصیلات کے مطابق سعودی ایوی ایشن اتھارٹی نے عازمین حج کو سہولت فراہم کرنے کیلئے اہم قدم اٹھاتے ہوئے دنیا بھر سے فریضہ حج کی ادائیگی کیلئے آنے والے عازمین کیلئے امیگریشن لینڈنگ کارڈ کی شرط ختم کردی۔
اس حوالے سے جنرل اتھارٹی آف سول ایوی ایشن (جی اے سی اے) نے احکامات جاری کردیئے، سعودی ایوی ایشن کا جاری کردہ خط کی کاپی اے آروائی نیوز کو موصول ہوگیا۔
سعودی ایوی ایشن نے پاکستان سمیت دنیا بھر کی تمام ایئر لائنز کو ہدایت جاری کردی۔ پاکستان سمیت دنیا بھر سے آنے والے عازمین امیگریشن لینڈنگ کارڈ نہیں بھریں گے۔
جی اے سی اے کے مطابق امیگریشن لینڈنگ کارڈ بھرنے کی وجہ سے جدہ کے کنگ عبدالعزیز ایئرپورٹ پر رش لگ جاتا تھا، عازمین کو سہولت فراہم کیلئے اقدامات اٹھائے گئے ہیں۔
