ریاض: سعودی عدالت نے مالی غبن کے مرتکب 11 پاکستانیوں کو قید اور ملک سے بے دخل کرنے کی سزا سنادی۔
بین الاقوامی خبر رساں ادارے کی رپورٹ کے مطابق سعودی عرب میں مالی فراڈ کے الزام میں حراست میں لئے گئے 11 پاکستانیوں کو قید کی سزا سنا دی گئی ہے۔
پبلک پراسیکیوشن کے مطابق 11 رکنی پاکستانی گروہ نے متعدد مرتبہ دھوکے سے بینک صارفین کے اکاؤنٹس سے رقوم نکلوائیں۔
11پاکستانیوں کے خلاف مالیاتی فراڈ کرنے پر تفتیش مکمل کی گئی اور مجرمان نے اپنا جرم بھی قبول کرلیا، گرفتار کیا گیا گروہ شہریوں کو فون اور میسج کرکے تفصیلات طلب کرتا تھا اور پھر ان کے اکاؤنٹ سے پیسے نکال لئے جاتے تھے۔
سعودی عدالت نے سخت ایکشن لیتے ہوئے مجرمان پر قید اور ملک سے بے دخل کرنے کی سزا سنادی ہے، ہر ملزم کو زیادہ سے زیادہ 7 سال قید کی سزا سنائی گئی ہے اور سزا پوری ہونے کے بعد مجرمان کو ملک بدر کردیا جائے گا۔
واضح رہے کہ سعودیہ عرب میں بڑی تعداد میں پاکستانی کمیونٹی کے افراد روزگار کے حصول کے لئے موجود ہیں، جہاں وہ مختلف پیشوں سے منسلک ہیں۔
