بیجنگ: سعودی ولی عہد محمد بن سلمان نے دیوارِ چین کا دورہ کیا اور وہاں کے مناظر سے خوب لطف اندوز ہوئے۔
تفصیلات کے مطابق سعودی ولی عہد اپنے ساتھیوں کے ہمراہ گزشتہ روز چین پہنچے جہاں انہوں نے چینی صدر جن پنگ اور وائس پریمیئر ہان زینگ سمیت دیگر اعلیٰ حکام سے ملاقاتیں کیں۔
چین سے سعودی مہمان کا شاندار استقبال کیا، اس موقع پر شاہی مہمان دیوار چین گئے اور انہوں نے وہاں سے مناظر دیکھے۔ سعودی گزیکٹ نے دیوارِ چین دورے کی ویڈیو بھی جاری کی۔
#VIDEO: #Saudi Crown Prince #MuhammadBinSalman visits the Great Wall of #China during a tour accompanied by the Chinese ambassador to Saudi Arabia and a number of officials. #CrownPrinceinChina pic.twitter.com/McfmdZ4vxd
— Saudi Gazette (@Saudi_Gazette) February 21, 2019
محمد بن سلمان نے چین سے مختلف شعبوں میں 10 ارب ڈالرز سے زائد کے معاہدے کیے جن میں تیل اور توانائی سمیت دیگر اہم شعبے شامل ہیں۔ دونوں ممالک نے چین کے شمالی مشرقی صوبے لیاؤننگ میں پیٹرو کیمیکل کمپلیکس کی تعمیر کے معاہدے پر بھی دستخط کیے۔
اس موقع پر شاہی مہمان نے مشترکہ کانفرنس کے دوران کہا کہ ’چین سعودی عرب کا اچھا دوست اور شراکت دار ہے، ہمارے تعلقات طویل عرصے سے قائم ہیں اور وقت کے ساتھ ان کی اہمیت مزید بڑھتی جارہی ہے‘۔
یاد رہے کہ سعودی ولی عہد 17 فروری کو ایشیا کے 5 ممالک کے کے دورے پر سب سے پہلے پاکستان پہنچے تھے جہاں اُن کا فقید المثال استقبال کیا گیا تھا۔
بعد ازاں محمد بن سلمان 19 فروری کو دو روزہ دورے پر بھارت پہنچے اس دورے کو مکمل کرنے کے بعد ولی عہد 21 فروری کو چین پہنچے۔
چین کے بعد محمد بن سلمان جنوبی کوریا کا دورہ کریں گے اور سربراہان مملکت اور اعلیٰ حکومتی عہدیداران سے ملاقاتیں کریں گے۔