ریاض: سعودی وزیر خارجہ شہزادہ فیصل بن فرحان کا کہنا ہے کہ اسرائیل کے ساتھ عرب ممالک اسی وقت تعلقات استوار کریں گے جب اسرائیلی اور فلسطینی کسی حل پر متفق ہوجائیں گے، اسرائیل سے ہمارا کوئی تعلق نہیں۔
سعودی ویب سائٹ کو انٹرویو دیتے ہوئے سعودی وزیر خارجہ شہزادہ فیصل بن فرحان کا کہنا ہے کہ سعودی عرب پوری قوت کے ساتھ فلسطین کے ساتھ کھڑا ہے، اسرائیل سے ہمارا کوئی تعلق نہیں۔
سعودی وزیر خارجہ کا کہنا تھا کہ مسئلہ فلسطین سے متعلق سعودی عرب کی جو پالیسی کل تھی وہی آج ہے اور وہی کل بھی رہے گی۔ اس بات کی کوئی حقیقت نہیں کہ سعودی عرب اور اسرائیلی ملاقات کی اسکیمیں بنی ہوئی ہیں۔
انہوں نے کہا کہ اسرائیل کے ساتھ عرب ممالک اسی وقت تعلقات استوار کریں گے جب اسرائیلی اور فلسطینی کسی حل پر متفق ہوجائیں گے۔ ہم مسئلہ فلسطین کے حل کی کسی بھی کوشش کا خیر مقدم کریں گے۔
خیال رہے کہ خادم حرمین شریفین شاہ سلمان بن عبدالعزیز نے امریکی صدر ڈونلڈ ٹرمپ کی جانب سے مشرق وسطیٰ امن منصوبے کے اعلان کے فوری بعد فلسطینی صدر محمود عباس سے ٹیلیفون پر رابطہ کیا تھا۔
شاہ سلمان نے فلسطینی صدر کو کہا تھا کہ مسئلہ فلسطین اور فلسطینی عوام کے حقوق سے متعلق سعودی عرب کا مؤقف تبدیل ہونے والا نہیں، شاہ عبد العزیز کے عہد سے لے کر اب تک فلسطینی کاز کی حمایت کی گئی ہے اور کی جاتی رہے گی۔
