ریاض: سعودی عرب نے ویزا کی مدت ختم ہونے کے باوجود قیام کرنے والے زائرین پر6 ماہ قید اور بھاری جرمانہ عائد کرنے کا اعلان کردیا ہے۔
تفصیلات کے مطابق سعودی عرب میں حکام نے خبردار کیا ہے کہ عمرے کے ویزے کی معیاد ختم ہونے کے بعد قیام کرنے والی زائرین کے خلاف سخت کارروائی کی جائے گی۔
سعودی ڈائریکٹریٹ جنرل آف پاسپورٹس کی جانب سے اعلامیہ جاری کیا گیا ہے کہ وہ عمرہ زائرین جو ویزا کی معیاد ختم ہونے کے باوجود سعودی عرب میں قیام کررہے ہیں، ان زائرین کو ملک بدر کرنے سے پہلے 50 ہزار ریال کا جرمانہ اور چھ ماہ قید کی سزا بھگتنا پڑے گی۔
اعلامیہ میں تمام غیر ملکی عمرہ زائرین کو تلقین کی گئی ہے کہ وہ اپنے طے شدہ سفری شیڈول کے مطابق ویزے کی معیاد ختم ہونے سے قبل واپس چلے جائیں، انہیں یہاں قیام یا کام کرنے کی اجازت نہیں تاہم عمرے کے ویزے پر آنے والوں کو مکہ مکرمہ، مدینہ منورہ اور جدہ جانے کی اجازت ہے البتہ کسی چوتھے شہر جانے کی اجازت نہیں۔
حکام نے شہریوں اور رہائشیوں کو خبردار کیا کہ عمرے کے ویزے کی معیاد ختم ہونے کے بعد زائرین کو ملک میں رہنے میں مدد دینے والوں کے خلاف سخت کارروائی کی جائے۔
سعودی ادارہ برائے شماریات کے مطابق سال 2017ء کے دوران ایک کروڑ 90 لاکھ 79 ہزار 306 افراد نے عمرہ ادا کیا۔ ان افراد میں سے 65 لاکھ 32 ہزار 74 افراد بیرون ملک سے آئے تھے۔
یاد رہے کہ لاکھوں کی تعداد میں مسلمان عمرہ کی ادائیگی کے لیے سعودی عرب آتے ہیں۔
