ریاض: سعودی فرماں روا شاہ سلمان اور ولئ عہد محمد بن سلمان نے جرمنی میں قدرتی آفت میں ہلاکتوں پر اظہار افسوس کیا ہے۔
تفصیلات کے مطابق جرمنی میں سیلاب سے ہلاکتوں پر سعودی قیادت خادم حرمین شریفین شاہ سلمان بن عبد العزیز اور ولئ عہد شہزادہ محمد بن سلمان نے جرمن چانسلر انگیلا مرکل کو مکتوب بھیج دیے ہیں۔
سعودی قیادت نے الگ الگ مکتوبات میں جرمن چانسلر سے طوفانی بارشوں کے باعث ہونے والی ہلاکتوں پر اظہار افسوس کیا ہے۔
سعودی پریس ایجنسی کے مطابق شاہ سلمان نے اپنے مکتوب میں کہا کہ جرمنی میں طوفانی بارش اور سیلاب کے باعث ہونے والے نقصان کا علم ہوا، اس کے باعث متعدد افراد کی ہلاکت، زخمی ہونے اور لاپتا ہونے پر انتہائی افسوس ہوا ہے۔
انھوں نے لکھا ہم امید رکھتے ہیں کہ زخمی افراد جلد شفایاب ہوں گے، جب کہ لاپتا ہونے والوں کا سراغ لگایا جائے گا تاکہ جلد وہ اپنے پیاروں سے ملیں۔
ولئ عہد اور وزیر دفاع محمد بن سلمان نے جرمن چانسلر انگیلا مرکل کے نام اپنے مکتوب میں کہا کہ جرمنی میں سیلابی ریلوں کے باعث ہونے والے جانی نقصان پر انھیں انتہائی افسوس اور دکھ ہوا ہے۔
انھوں نے لکھا جو لوگ زخمی ہیں ان کی جلد صحت یابی کی امید ہے، جب کہ ہلاک شدگان کے اعزا کے غم میں برابر کے شریک ہیں۔
