ریاض: سعودی عرب میں ملکی قوانین و ضوابط پر عمل نہ کرنے والی ایپس پر کال کی سہولت بند کردی گئی ہے، سعودی وزیر کا کہنا ہے کہ صارفین کے ڈیٹا کو خفیہ رکھنا ایک عالمی چیلنج کے طور پر سامنے آیا ہے۔
سعودی ویب سائٹ کے مطابق سعودی عرب کی وزارت مواصلات و انفارمیشن ٹیکنالوجی نے کہا ہے کہ مملکت کے قوانین و ضوابط پر عمل نہ کرنے والی ایپس پر کال کی سہولت بند رہے گی۔
وزیر مواصلات و انفارمیشن ٹیکنالوجی عبداللہ السواحہ کا کہنا ہے کہ کسی کو بھی وہ ریڈ لائن پار کرنے کی اجازت نہیں دی جائے گی جو ملک و قوم کی خود مختاری اور سیکیورٹی کا تحفظ کرتی ہے۔
ان کا کہنا تھا کہ لوگوں کی جانب سے حساس ڈیٹا کو سوشل میڈیا پر لاپرواہی سے شیئر کرنے کے باعث صارفین کے ڈیٹا کو خفیہ رکھنا ایک عالمی چیلنج کے طور پر سامنے آیا ہے۔
سعودی وزیر کے مطابق حکومت نے کچھ ایسی کمپنیوں کا پتہ لگا کر ان کے خلاف کارروائی کی ہے جنہوں نے صارفین کا ڈیٹا بیچا، انہوں نے زور دیتے ہوئے کہا ہے کہ شعور اجاگر کرنا اور قوانین و ضوابط مرتب کرنا حکومت کی بنیادی ذمہ داری ہے۔
