ریاض: سعودی استاد کی ڈائلاسز کے دوران آن لائن طالب علموں کو پڑھانے کی ویڈیو سوشل میڈیا پر وائرل ہوگئی۔
تفصیلات کے مطابق سعودی استاد خالد عکاش کو ڈائلاسز کے دوران طالب علموں کو پڑھانے پر سوشل میڈیا پر صارفین کی جانب سے سراہا جا رہا ہے۔
خالد عکاش کا کہنا تھا کہ مجھے اسکول انتظامیہ نے پیشکش کی تھی کہ کلاس کا وقت تبدیل کرلوں، طلباء کو بھی علم تھا کہ گردے کی صفائی کے دوران آن لائن کلاس لینا مشکل ہے مگر مجھے اچھا نہیں لگا کہ بچوں کو نقصان ہو۔
سعودی استاد نے بتایا کہ یہ فیصلہ اس لیے کیا کیونکہ کلاس کا تعلق قرآن کریم کی تلاوت اور قرآت سے تھا، طلبہ کو میری مشکل معلوم تھی، وہ یکے بعد دیگرے قرآن کریم کی تلاوت کرتے رہے، میں انہیں سنتا رہا جہاں غلطی ہوتی تھی اس کی اصلاح کرتا رہا، ایک طرح سے قرآن کریم کی تلاوت اور تجوید کا درس میرے لیے روحانی سکون کا باعث بن گیا۔
بهمتنا سنكون قادرين بإذن الله على تجاوز الأزمات ..
المعلم / خالد عكاش من #تعليم_الخرج نموذج مُشرِّف رغم معاناته مع المرض في التعامل مع #منصة_مدرستي pic.twitter.com/f9E81nf1T5— إدارة تعليم الخرج (@MOE_KRH) September 11, 2020
خالد عکاش کا کہنا تھا کہ کلاس لینے کا مجھے ایک فائدہ یہ ہوا کہ طلبہ میں ذمہ داری کا احساس بڑھ گیا، میں نے محسوس کیا کہ طلباء کے ساتھ میرا رشتہ اور زیادہ گہرا ہوگیا ہے، طلباء نے احساس کا مظاہرہ کرتے ہوئے دیگر دنوں کے مقابلے میں زیادہ بہتر انداز میں قرآن کریم کی تلاوت کا اہتمام کیا۔
انہوں نے بتایا کہ گزشتہ 8 سال سے گردے کی تکلیف میں مبتلا ہوں، شروع میں بے حد مشکل ہوتی تھی درد سے تڑپ جاتا تھا مگر اب مجھے عادت ہوگئی ہے، ایک سال سے ہفتے میں 3 بار گردے کی صفائی ہوتی ہے، اس میں ساڑھے 4 گھنٹے لگتے ہیں۔