ریاض: سعودی عرب میں ایک خاتون کو تنگ کرنے والا ڈرائیور مشکل میں پھنس گیا، محکمہ ٹریفک نے فوری طور پر ڈرائیور کے خلاف کارروائی کی۔
سعودی ویب سائٹ کے مطابق سعودی محکمہ ٹریفک نے ایک سعودی خاتون ڈرائیور کی طرف سے شیئر کی جانے والی ویڈیو پر کارروائی کرتے ہوئے ایک ڈرائیور کے خلاف کارروائی کی ہے۔
یہ ویڈیو جدہ کے رائل ٹرمینل اور جوہرہ اسٹیڈیم کے درمیان سفر کرنے والی ایک خاتون نے شیئر کی ہے جس میں دیکھا جا سکتا ہے کہ سامنے والی گاڑی انہیں راستہ نہیں دے رہی۔
خاتون نے ویڈیو میں کہا کہ سامنے والی گاڑی کا ڈرائیور مسلسل مجھے تنگ کر رہا ہے اور راستہ نہیں دے رہا۔
سماجی رابطے کی ویب سائٹ ٹویٹر پر ویڈیو شیئر ہوتے ہی محکمہ ٹریفک نے فوری کارروائی کی اور خلاف ورزی کرنے والے ڈرائیور کی شناخت کرلی۔
محکمہ ٹریفک نے مذکورہ شخص کے خلاف ٹریفک قوانین کے مطابق کارروائی کی ہے، خاتون نے فوری کارروائی پر محکمہ ٹریفک کا شکریہ ادا کیا۔
