ریاض: سعودی محکمے جوازات نے وزٹ ویزے پر مملکت میں آنے والوں کے لیے ابشر پورٹل پر اکاؤنٹ بنانے کا طریقہ کار واضح کر دیا۔
تفصیلات کے مطابق ابشر مشین میں اقامہ نمبر درج کرنا ہوتا ہے جس کا آغاز نمبر 1 یا 2 سے ہوتا ہے جب کہ وزٹ ویزے پر آنے والوں کو دیے گئے امیگریشن سیریل نمبر کا آغاز نمبر 4 سے ہوتا ہے۔
اس مسئلے کا حل جوازات نے ٹویٹر اکاؤنٹ پر بتا دیا ہے، جوازات کا کہنا ہے کہ وزٹ ویزے پر آنے والے افراد ابشر پورٹل پر اکاؤنٹ بنانے کے لیے کسی بھی شہر میں قائم جوازات کے ذیلی دفتر سے رجوع کر سکتے ہیں۔
جوازات کے مطابق ’سلیف سروس‘ کی مشینوں میں بھی اس سہولت کا آغاز کیا جا چکا ہے، جب کہ بینکوں میں بھی ابشر پورٹل کی سہولت فراہم کی گئی ہے۔ اگر اکاؤنٹ بنانے میں پھر بھی کسی قسم کی دشواری کا سامنا ہو تو ابشر کے مرکزی ٹیلی فون نمبر 920020405 پر رابطہ کر کے اپنا مسئلہ بیان کیا جا سکتا ہے۔
واضح رہے کہ سعودی عرب میں غیر ملکیوں کے لیے اقامہ اور رہائشی قوانین واضح ہیں، جن پر عمل کرنا سب کے لیے لازمی ہے۔ آجر اور اجیر کے حوالے سے بھی قوانین موجود ہیں جن سے آگاہی ضروری ہے۔
یاد رہے کہ کرونا وائرس کی وبا کے پیش نظر گزشتہ برس سعودی حکومت کی جانب سے غیر ملکیوں کے اقامے اور خروج وعودہ کی مدت میں خود کار طریقے سے توسیع کی گئی تھی، بعدازاں حکومت نے یہ سہولت ابشر اور مقیم سروس کے ذریعے فراہم کر دی، جس میں مطلوبہ مدت کی فیس ادا کرنے کے بعد سروس حاصل کی جا سکتی ہے۔
