ریاض: سعودی محکمہ پاسپورٹ نے سوشل میڈیا پر وائرل اس ویڈیو کے حوالے سے وضاحت دی ہے جس میں دعویٰ کیا جارہا ہے کہ وزٹ ویزے کو باقاعدہ اقامے میں تبدیل کرنے کی منظوری دے دی گئی ہے۔
سعودی ویب سائٹ کے مطابق سعودی عرب میں سوشل میڈیا پر ایک ویڈیو وائرل ہے جس میں دعویٰ کیا جارہا ہے کہ سعودی وزارت داخلہ نے وزٹ ویزے کو باقاعدہ اقامے میں تبدیل کرنے کی منظوری دی ہے۔
یہ بھی دریافت کیا جا رہا ہے کہ وزٹ ویزے کو اقامے میں تبدیل کروانے کے لیے کیا کارروائی کرنی ہوگی اورکون سی دستاویز درکار ہیں۔
مذکورہ وائرل ویڈیو کے حوالے سے محکمہ پاسپورٹ سے سوالات بھی کیے جا رہے ہیں۔
محکمہ پاسپورٹ نے وضاحت کرتے ہوئے کہا ہے کہ موجودہ نظام کے مطابق وزٹ ویزے کو اقامے میں تبدیل نہیں کیا جاسکتا، اس کی اجازت نہیں ہے۔
محکمے کا کہنا ہے کہ وزارت داخلہ نے ایسی کوئی منظوری نہیں دی ہے، اس کے برخلاف جو دعویٰ کیا جارہا ہے وہ بے بنیاد ہے۔
یاد رہے کہ محکمہ پاسپورٹ نے ایک بیان میں کہا تھا کہ 18 برس سے کم عمر بچوں کے وزٹ ویزے کو ایسی صورت میں اقامے میں تبدیل کیا جاسکتا ہے اگر ان کے والدین مملکت میں باقاعدہ اقامے پر ہوں۔
