ریاض: سعودی عرب کے محکمہ پاسپورٹ اینڈ امیگریشن جوازات نے معلومات فراہم کی ہیں کہ تجارتی وزٹ ویزے کی مدت کا تعین کس طرح کیا جائے تاکہ کسی قسم کے جرمانے سے بچا جا سکے۔
سعودی ویب سائٹ کے مطابق سعودی عرب میں عمرہ، حج اور ورک ویزے کے علاوہ وزٹ ویزے بھی جاری کیے جاتے ہیِں، وزٹ ویزے کی 2 اقسام ہیں جن میں فیملی وزٹ اور بزنس وزٹ ویزے شامل ہیں۔
فیملی وزٹ ویزے مملکت میں مقیم اہل خانہ کے لیے جاری کیے جاتے ہیں جبکہ بزنس وزٹ ویزے کاروباری تقاضے کے تحت جاری کیے جاتے ہیں، وزٹ ویزے پر جسے بلایا جاتا ہے اسے وزٹر یا عربی میں زائر کہا جاتا ہے۔
وزٹ ویزے کی مقررہ مدت ہوتی ہے جس میں بعد ازاں توسیع کرانا ممکن ہوتا ہے۔
وزٹ ویزے کے حوالے سے ایک شخص نے جوازات کے ٹویٹر پر استفسار کیا کہ تجارتی وزٹ ویزے پر آنے والے مہمان کی ویزہ ایکسپائری کی درست تاریخ کس طرح معلوم کی جاسکتی ہے؟ سوال کا جواب دیتے ہوئے سعودی محکمہ پاسپورٹ اینڈ امیگریشن جوازات کا کہنا تھا کہ کمرشل وزٹ ویزے پر آنے والے مقررہ مدت تک قیام کرسکتے ہیں۔
وزٹر کے قیام کی درست مدت کا تعین جوازات کے ابشر اکاؤنٹ سے کیا جاسکتا ہے۔
مقررہ مدت کے اختتام سے قبل اگر ان کے وزٹ ویزے کی مدت میں توسیع کروانا درکار ہوتی ہے تو ان کے اسپانسرکو چاہیئے کہ وہ وقت کے اختتام سے قبل مقررہ فیس ادا کرنے کے بعد ویزے کی مدت میں توسیع کروائیں۔
وزٹ ویزہ خواہ وہ فیملی ہو یا کمرشل وزٹرز اور ان کے اسپانسرز کو چاہیئے کہ وہ مقررہ مدت کا خاص خیال رکھیں، اس حوالے سے لازمی ہے کہ وزٹرز کی مملکت انٹری کی درست تاریخ کا خیال رکھا جائے تاکہ وہ وقت مقررہ پر اس مدت میں توسیع کریں تاکہ کسی قسم کے جرمانے سے بچا جا سکے۔
وزٹ ویزے پر آنے والوں کے ویزے کی مدت کا تعین وزٹر کے مملکت آنے والے دن سے کیا جاتا ہے اس لیے بعض لوگ مدت کا تعین کرنے میں غلطی کرجاتے ہیں، اس کے لیے وزٹ ویزے پر آنے والے اسپانسرز کو چاہیئے کہ وہ اپنے ابشر یا مقیم اکاؤنٹ کے ذریعے وزٹ ویزے خواہ وہ فیملی ہو یا کمرشل آنے والوں کی درست تاریخ کا تعین کریں تاکہ کسی غلطی کا امکان نہ رہے۔
مملکت میں سفری پابندی کے خاتمے کے حوالے سے ایک شخص نے پوچھا کہ وہ افراد جنہوں نے 14 دن غیر پابندی والے ملک میں گزارے ہیں وہ بھی مملکت آنے پر قرنطینہ کریں گے؟
سوال کا جواب دیتے ہوئے جوازات کا کہنا تھا کہ وہ غیر ملکی جنہوں نے مملکت میں رہتے ہوئے ویکسین کی دونوں خوراکیں لگوائی ہوئی ہوں اور توکلنا ایپ پر ان کا اسٹیٹس امیون ہو وہ براہ راست آسکتے ہیں۔
ان کے علاوہ ایسے افراد جنہوں نے اپنے ملک میں ویکسین لگوائی ہے انہیں پانچ دن ہوٹل میں قرنطینہ کرنا ہوگا۔
ہوٹل قرنطینہ سے نکلنے کے لیے پانچویں دن کووڈ 19 کا پی سی آر ٹیسٹ بھی کرانا ہوگا جس کی رپورٹ منفی آنے پر ہی انہیں قرنطینہ سے نکلنے کی اجازت ہوگی۔
