عید قرباں کی آمد کے ساتھ ہی گھروں میں ذبیحہ کیے جانے والے جانوروں کا گوشت اکٹھا ہوجائے گا اور اس کے خراب ہونے کا اندیشہ بھی ہوگا تاہم اب آپ گوشت کو 2 ماہ تک کے لیے محفوظ بنا سکتے ہیں۔
سعودی عرب اور خلیجی ممالک سمیت دنیا کے مختلف ممالک میں آج عیدالضحیٰ مذہبی جوش و خروش سے منائی گئی جبکہ کل پاکستان اور دیگر ایشیائی ممالک میں بھی فرزندان توحید سنتِ ابراہیمی ادا کرتے ہوئے اپنے جانور اللہ کی راہ میں قربان کریں گے۔
قربانی کی استطاعت رکھنے والے مسلمان نمازِ عید کے بعد جانور قربان کریں گے اور شرعی حکم کے مطابق اس کے گوشت کو غرباء، مساکین و دیگر مصارف میں تقسیم بھی کریں گے تاہم یہ سب کرنے کے باوجود بھی گھروں میں گوشت کی بڑی تعداد اکھٹا ہوجائے گا۔
گوشت کو محفوظ بنانے کے لیے مختلف گھریلو ٹوٹکے استعمال کیے جاتے ہیں جبکہ جدید دور میں اسے محفوظ بنانے کے لیے فریج کو نہایت اہمیت حاصل ہے یہی وجہ ہے کہ عیدقرباں سے قبل فریج یا ڈیپ فریزیر کی خرید و فروخت میں اضافہ بھی ہوجاتا ہے۔
اگر آپ قربانی کے گوشت کو زیادہ عرصے محفوظ بنانا اور استعمال کرنا چاہتے ہیں تو درج طریقے آزما کر گوشت کو 2 ماہ تک کے لیے محفوظ بنا سکتے ہیں۔
گوشت محفوظ بنانے کے آزمودہ طریقے
1.قربانی کا گوشت فریز کرنے سے قبل اسے دھونے سے گریز کریں کیونکہ گوشت پر پانی لگنے کے بعد اسے رکھا جائے تو اس میں بیکٹریا پیدا ہوجاتا ہے جو گوشت کو خراب کردیتا ہے۔
2.گوشت کو تھوڑی دیر چولھے پر رکھ کر بھونیں اور پھر اسے المونیم فوائل میں لپیٹ کر رکھ دیں جس کے بعد گوشت دو ماہ تک بالکل محفوظ رہے گا۔
3. ایسے لوگ جن کے پاس فریج موجود نہیں وہ گوشت کو بوٹیوں کی صورت میں کر کے ایک دھاگے میں پرو ئیں اور اُسے دھوپ و ہوا میں لٹکا کر سُکھا لیں ، بعد ازاں جب ضرورت پڑے اسے استعمال کریں۔
