سعودی عرب میں قومی دن کی خوشی میں ایک کروڑ سے زائد اشیا پر خصوصی رعایت کا اعلان کیا گیا ہے۔
سعودی میڈیا کے مطابق تجارتی ادارے اور آن لائن اسٹورز قومی دن کے موقع پر 12 ملین سے زائد رعایتی مصنوعات پیش کر رہے ہیں۔
وزارتِ تجارت نے اعلان کیا ہے کہ سعودی قومی دن کے موقع پر تجارتی اداروں اور آن لائن اسٹورز کی جانب سے 12 ملین سے زائد مصنوعات پر رعایت (ڈسکاؤنٹ) کی پیشکش کی جا رہی ہے، جن میں ہر قسم کی صارفی اشیاء شامل ہیں۔
وزارت نے تجارتی اداروں اور آن لائن اسٹورز کو رعایت دینے کے لیے 3,500 سے زائد لائسنس جاری کیے ہیں۔ ہر لائسنس متعلقہ ادارے کو اپنی تمام شاخوں اور سیلز پوائنٹس پر رعایت کی پیشکش کرنے کا مجاز بناتا ہے۔
صارفین موبائل فون کیمرے کے ذریعے ڈسکاؤنٹ لائسنس پر موجود ‘یونیفائیڈ الیکٹرانک کوڈ’ کے بارکوڈ کو اسکین کر کے رعایت کی قانونی حیثیت اور درستگی کی تصدیق کر سکتے ہیں۔
اسکین کرنے پر رعایت سے متعلق تمام معلومات ظاہر ہو جاتی ہیں، جن میں رعایت کی نوعیت اور شرح، اس کی مدت اور ادارے کی تفصیلات شامل ہیں۔
