The news is by your side.

Advertisement

طلبا کیلئے سود سے پاک قرضوں کی فراہمی ، بڑی خوشخبری آگئی

کراچی :اسٹیٹ بینک کی ایپکس کمیٹی نے اسٹوڈنٹ لون اسکیم کے تحت میرٹ پر طلبہ کو سود سے پاک قرضے کی منظوری دے دی ، قرضے 10سال کی زیادہ سے زیادہ مدت کیلئےدیے جارہے ہیں۔

تفصیلات کے مطابق اسٹیٹ بینک کی جانب سے بیان میں کہا گیا ہے کہ اسٹوڈنٹ لون اسکیم کی ایپکس کمیٹی نے پاکستان میں تعلیم کے لیے مستحق طلبہ کے لیے سود سے پاک قرضوں کے طور پر 82.6 ملین روپے کی منظوری دے دی۔

اعلامیے میں کہا ہے کہ ایپکس کمیٹی کی منظور کردہ رقم ملک بھر کی سرکاری جامعات میں سیشن 2017-18ء، 2018-19ء اور 2019-20ء کے لیے مختلف شعبوں میں انڈر گریجویشن، گریجویشن اور پی ایچ ڈی کی اسناد کے لیے زیر تعلیم 518 مستحق طلبہ میں تقسیم کی جائے گی۔

اسٹوڈنٹ لون اسکیم کا مقصد ناکافی وسائل رکھنے والے میرٹ کے حامل کو مالی معاونت فراہم کرنا ہے، یہ قرضے پہلی قسط کی تقسیم کی تاریخ سے دس سال کی زیادہ سے زیادہ مدت کے لیے دیے جارہے ہیں اور پہلی ملازمت کی تاریخ کے چھ ماہ بعد یا تعلیم کی تکمیل کی تاریخ کے ایک سال بعد سے، ان میں سے جو بھی پہلے ہو، ماہانہ اقساط میں قابل واپسی ہوں گے۔

اسکیم کے منتظم کے طور پر نیشنل بینک آف پاکستان تمام ذمہ داریاں انجام دے رہا ہے، جیسے قرضے کی درخواستیں وصول کرنا اور ان کی چھان بین کرنا، قرضوں کی تقسیم اور واپسی۔ کامیاب طلبہ کے نام نیشنل بینک آف پاکستان کی ویب سائٹ کے اس لنک پر دستیاب ہیں:https://www.nbp.com.pk/studentloan/

اسٹوڈنٹ لون اسکیم کی ایپکس کمیٹی میں بینک دولت پاکستان، فنانس ڈویژن (حکومت پاکستان) اور پانچ بڑے بینکوں (نیشنل بینک، حبیب بینک، یونائیٹڈ بینک، الائیڈ بینک، ایم سی بی بینک) کی نمائندگی ہے۔

Comments

یہ بھی پڑھیں