کراچی: اسٹیٹ بینک آف پاکستان (ایس بی پی) نے تصدیق کی ہے کہ ملکی زرمبادلہ کے ذخائر میں 7 کروڑ 30 لاکھ ڈالرز کی کمی ہوگئی۔
اسٹیٹ بینک آف پاکستان کے ترجمان کی جانب سے جاری ہونے والے اعلامیے کے مطابق 7 اگست 2020 تک ملکی زرمبادلہ کے ذخائر 7 کروڑ 30 لاکھ ڈالرز کم ہوئے جس کے بعد اُن کی مجموعی مالیت 19 ارب 51 کروڑ ڈالرز تک پہنچ گئی۔
ترجمان ایس بی پی کے مطابق حالیہ کمی کے بعد اسٹیٹ بینک آف پاکستان کے پاس موجود ذخائر کی مالیت 12 ارب 46 کروڑ ڈالرز ہے جبکہ کمرشل بینکوں کے پاس 7 ارب ڈالرز کے ذخائر موجود ہیں۔
یاد رہے کہ اسٹیٹ بینک آف پاکستان (ایس بی پی) نے 6 اگست کو زرمبادلہ کے ذخائر کے حوالے سے رپورٹ جاری کی تھی جس میں بتایا گیا تھا کہ ملکی زرمبادلہ کے ذخائر میں 65 کروڑ ڈالرز کا مزید اضافہ ہوا ہے۔
مزید پڑھیں: زرمبادلہ کے ذخائر میں 65 کروڑ ڈالرز کا اضافہ
اسٹیٹ بینک آف پاکستان کے ترجمان کی جانب سے جاری ہونے والے اعلامیے میں بتایا گیا تھا کہ اضافے کے بعد زرمبادلہ کے سرکاری ذخائر کی مالیت 12 ارب 54 کروڑ 22 لاکھ ڈالر تک پہنچ گئی۔
اعلامیے میں بتایا گیا تھا کہ گزشتہ ہفتے ورلڈ بینک کی جانب سے ملنے والے 50 کروڑ 55 لاکھ ڈالرز کے بعد زرمبادلہ کے ذخائر میں اضافہ ہوا۔