The news is by your side.

Advertisement

سپریم کورٹ نے آرٹیکل63 اے کی تشریح کیلئے صدارتی ریفرنس پر لارجر بینچ تشکیل دے دیا

اسلام آباد : سپریم کورٹ نے آرٹیکل63اے کی تشریح کیلئے صدارتی ریفرنس پر لارجر بینچ تشکیل دے دیا، 5رکنی بینچ 24 مارچ کوسماعت کرے گا۔

تفصیلات کے مطابق سپریم کورٹ نے آرٹیکل 63 اے کی تشریح کیلئے صدارتی ریفرنس پر لارجر بینچ تشکیل دے دیا، ذرائع کا کہنا ہے کہ چیف جسٹس کی سربراہی میں 5رکنی بینچ 24 مارچ کوسماعت کرے گا۔

ذرائع نے بتایا کہ بینچ میں جسٹس منیب اختر،جسٹس اعجازالاحسن ، جسٹس مظہرعالم خان،جسٹس جمال خان مندوخیل شامل ہیں۔

گذشتہ روز سپریم کورٹ میں اسلام آباد میں جلسے روکنے کی درخواست پر سماعت ہوئی تھی ، جس میں عدالت نے آرٹیکل63اے سے متعلق صدارتی ریفرنس پر لارجر بینچ تشکیل دینے کا فیصلہ کرتے ہوئے تمام سیاسی جماعتوں کو صدارتی ریفرنس پر نوٹس جاری کر دیئے تھے۔

چیف جسٹس نے ریمارکس دیئے تھے کہ پارلیمنٹ آئین کے تحت سب سے مرکزی ادارہ ہے، پارلیمنٹ کا کام آئین اور قانون کے مطابق ہونا چاہیے، پارلیمنٹ میں سیاسی جماعتوں کے بھی حقوق ہوتے ہیں، آرٹیکل 63 اے پارٹیوں کے حقوق کی بات کرتا ہے، کسی کو ووٹ دینے سے روکا نہیں جاسکتا اور عوامی مفاد میں کسی صورت سمجھوتہ نہیں ہونا چاہیے،عوام کا کاروبار زندگی بھی کسی وجہ سے متاثر نہیں ہونا چاہیے۔

چیف جسٹس پاکستان نے کہا تھا کہ ہم پروسیجر کے اندرنہیں جائیں گے ، ہم پارلیمانی پروسیجنگ کے اندر مداخلت نہیں کرنا چاہتے۔

Comments

یہ بھی پڑھیں