توہین عدالت کیس: دانیال عزیز کو جواب کے لیے 19 فروری تک کی مہلت -
The news is by your side.

Advertisement

توہین عدالت کیس: دانیال عزیز کو جواب کے لیے 19 فروری تک کی مہلت

اسلام آباد: توہین عدالت کیس میں مسلم لیگ ن کے رہنما اور وزیر برائے نجکاری دانیال عزیز کو جواب جمع کروانے کے لیے 19 فروری تک کی مہلت دے دی گئی۔

تفصیلات کے مطابق سپریم کورٹ کی جانب سے جاری کردہ نوٹس کے بعد وزیر برائے نجکاری دانیال عزیز سپریم کورٹ میں پیش ہوئے۔

سماعت کے دوران جسٹس شیخ عظمت سعید نے دریافت کیا کہ کیا آپ کچھ کہنا چاہتے ہیں؟ جس پر دانیال عزیز نے کہا کہ آپ نے نوٹس دیا تھا میں حاضر ہوں۔

جسٹس شیخ عظمت سعید نے دریافت کیا کہ آپ نے وکیل نہیں کیا؟ جواباً دانیال عزیز نے کہا کہ اگر ضرورت ہے تو کر لیتا ہوں۔

جسٹس شیخ عظمت سعید نے کہا کہ وکیل کی ہمیشہ ضرورت ہوتی ہے۔ آپ وکیل کرلیں، سب کچھ سامنے آجائے گا۔ ’سب کچھ صاف اور شفاف ہوگا‘۔

عدالت نے دانیال عزیز کو جواب کے لیے 19 فروری تک کی مہلت دے دی۔ سپریم کورٹ نے اٹارنی جنرل کو بھی نوٹس جاری کردیا۔ کیس کی مزید سماعت 19 فروری تک ملتوی کردی گئی۔

یاد رہے کہ مسلم لیگ ن کے سابق سینیٹر نہال ہاشمی کو توہین عدالت کیس میں ایک ماہ قید اور 50 ہزار جرمانے کی سزا کے بعد سپریم کورٹ نے طلال چوہدری اور دانیال عزیز کو بھی توہین عدالت پر طلبی کا نوٹس جاری کیا تھا۔

دانیال عزیز کی عدلیہ کے خلاف توہین آمیز تقاریر پر سپریم کورٹ نے انہیں آج طلب کیا تھا۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

Comments

comments

یہ بھی پڑھیں