اسلام آباد: سپریم کورٹ نے بیرون ملک جانے کی اجازت کیخلاف حکومتی اپیل پر شہباز شریف کو نوٹس جاری کرتے ہوئے لاہورہائی کورٹ سے کیس کا تمام ریکارڈ طلب کر لیا۔
تفصیلات کے مطابق سپریم کورٹ میں اپوزیشن لیڈر شہباز شریف کےبیرون ملک جانےکی اجازت کیخلاف حکومتی اپیل پرسماعت ہوئی ، جسٹس اعجازالاحسن نے استفسار کیا کیاکوئی میڈیکل ایمرجنسی تھی جوجلدسماعت ہوئی؟ جس پراٹارنی جنرل نے بتایا شہباز شریف کی طبی بنیادوں پر ضمانت مسترد ہوئی تھی،ایسا کوئی ریکارڈ نہیں کہ شہبازشریف کوایمرجنسی تھی۔
اٹارنی جنرل کا کہنا تھا کہ لاہور ہائی کورٹ نے تو وفاق کا مؤقف بھی نہیں سنا، یکطرفہ حکم دے کر عملدرآمد کےلئےبھی زور دیا گیا، شہباز شریف قابل احترام ہیں مگرانصاف قانون کےمطابق ہوناچاہیے۔
جسٹس اعجازالاحسن نے کہا شہباز شریف رکن پارلیمان اوراپوزیشن لیڈر ہیں، کیا ضمانت کےدوران بیرون ملک جانےپرپابندی ہے؟ تو اٹارنی جنرل کا کہنا تھا کہ
شہباز شریف کی ضمانت طبی بنیاد پر نہیں ہوئی تھی، قانونی پابندی نہ ہوتوکیاجیل سےسیدھاایئرپورٹ جایاجاسکتا ہے ، شہباز شریف کےبقول ان کانام بلیک لسٹ میں تھا، وفاق کا مؤقف سنا جاتا تو آگاہ کرتےکہ نام بلیک لسٹ میں نہیں، اٹشہباز شریف کا نام اب ای سی ایل میں شامل کیا گیا ہے۔
جسٹس سجاد علی شاہ نے استفسار کیا کیس واپس لینےپرتوہین عدالت کارروائی کیسےہوسکتی؟ اب تو بیرون ملک جانے کا سوال ختم ہوچکا تو اٹارنی جنرل نے کہا توہین عدالت کےحوالے سے حتمی عدالتی نظیرموجودنہیں، جسٹس اعجاز الاحسن نے ریمارکس دیئے ایف آئی اے سمیت سب کو عدالتی حکم کا علم تھا مگرعمل نہ کیاگیا۔
اٹارنی جنرل نے بتایا کہ نیب میں کیسز چل رہے لیکن اسے فریق نہیں بنایا گیا، اعدالت پراسیکیوٹر جنرل نیب کو بھی نوٹس جاری کرے، جسٹس اعجازالاحسن نے کہا کیس ریکارڈ آ جائےپھرنیب کو نوٹس کامعاملہ دیکھیں گے۔
سپریم کورٹ نے شہباز شریف کو نوٹس جاری کرتے ہوئے لاہورہائیکورٹ سےکیس کاتمام ریکارڈ طلب کر لیا اور پٹیشن کب دائر ہوئی، کب مقرر ہوئی تمام ریکارڈ فراہم کرنے کا حکم دے دیا۔
بعد ازاں سپریم کورٹ نےکیس کی سماعت آئندہ ہفتےبدھ تک ملتوی کردی۔
