site
stats
پاکستان

حلقہ این اے110، خواجہ آصف کی کامیابی کیخلاف درخواست مسترد

اسلام آباد : سپریم کورٹ نے این اے ایک سو دس سے متعلق اپیل کا فیصلہ سنا دیا، سپریم کورٹ نے خواجہ آصف کی کامیابی کیخلاف پی ٹی آئی رہنماعثمان ڈار کی اپیل مستردکردی۔

تفصیلات کے مطابق سپریم کورٹ کے تین رکنی بینچ نے حلقہ ایک سو دس میں خواجہ آصف کیخلاف تحریک انصاف کے عثمان ڈار کی اپیل کی سماعت کی، سماعت کے دوران جسٹس اعجاز نے استفسار کیا کہ کیا ریکارڈ تبدیلی یا کسی اور خرابی کا ذمے دار کامیاب امیدوار کو قرار دیا جاسکتا ہے۔

خواجہ آصف کے وکیل فاروق ایچ نائیک نے کہا کہ اس میں امیدوار کا کوئی قصورنہیں بلکہ انتظامی افسر ذمے دارہے، استدعا ہے کہ عثمان ڈار کی اپیل مسترد کرکے خواجہ آصف کو کامیاب قرار دیا جائے۔

سپریم کورٹ نے فریقین کے دلائل سننے کے بعد الیکشن کمیشن کا فیصلہ برقرار رکھا اور خواجہ آصف کی کامیابی کیخلاف پی ٹی آئی رہنما عثمان ڈار کی اپیل مسترد کردی۔

عدالت کے باہر خواجہ آصف کے وکیل فاروق ایچ نائیک نے میڈیا سے بات کرتے ہوئے کہا کہ سپریم کورٹ نے قرار دیا خواجہ آصف نے صحیح طریقے سے الیکشن جیتا، خواجہ آصف کی کامیابی میں کوئی بے ضابطگی نہیں پائی گئی۔

عثمان ڈار کے وکیل بابر اعوان نے میڈیا سے بات کرتے ہوئے کہا کہ تفصیلی فیصلے کے بعد اپنے مؤقف سے آگاہ کرینگے، خواجہ آصف کا حلقہ ان میں شامل تھا، جن کو عمران خان نے کھولنے کا مطالبہ کیا تھا۔


مزید پڑھیں : سپریم کورٹ نے خواجہ آصف کے حلقے کا گمشدہ ریکارڈ طلب کر لیا


واضح رہے کہ قومی اسمبلی کے حلقہ این اے 110 سے کامیاب امیدوار مسلم لیگ ن کے رکن اسمبلی اور وفاقی وزیر پانی و بجلی خواجہ آصف کی جیت کے خلاف پاکستان تحریک انصاف کے امیدوار محمد عثمان ڈار ووٹوں کی دوبارہ گنتی اور انگھوٹوں کی تصدیق کے لیے سپریم کورٹ جا پہنچے تھے۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top