اسکاٹ لینڈ کے ایک اسکول میں چند زور آور طالبات کی جانب سے ایک اور طالبہ کو بالوں سے پکڑ کر گھسیٹے جانے کی ویڈیو سامنے آنے پر والدین چیخ اٹھے۔
ویڈیو میں دیکھا جا سکتا ہے کہ ایک لڑکی اپنی ساتھی طالبہ کو اس کی پونی ٹیل سے پکڑ کر یہاں سے وہاں گھسیٹ رہی ہے۔ ویڈیو میں دیگر کئی طالبات بھی دکھائی دے رہی ہیں جو ہنس رہی ہیں اور مذکورہ لڑکی کی حوصلہ افزائی کر رہی ہیں۔
مذکورہ ویڈیو کو اسی اسکول میں پڑھنے والی ایک اور طالبہ کے والدین کی جانب سے سوشل میڈیا پر اپ لوڈ کیا گیا جنہوں نے دعویٰ کیا کہ ان کی بیٹی کو بھی اسی لڑکی نے ہراساں کیا۔
انہوں نے کہا کہ اس لڑکی نے ان کی بیٹی کا سر دروازے پر دے مارا تھا جس کے بعد مزید کسی ناخوشگوار واقعے سے بچنے کے لیے انہوں نے اپنی بیٹی کو دوسرے اسکول میں داخل کروا دیا۔
سوشل میڈیا پر ویڈیو وائرل ہونے کے بعد مذکورہ اسکول کے کئی والدین نے اس پر غم و غصے سے بھرے کمنٹس کیے جبکہ کچھ نے علاقے کی کونسل اور اسکول انتظامیہ کی توجہ بھی اس جانب دلائی۔
ایک والد نے لکھا کہ یہ اسکول کے بس کا معاملہ نہیں ہے، ان لڑکیوں کے لیے پولیس کو بلانا چاہیئے۔ تاحال اسکول انتظامیہ نے اس معاملے پر اپنا کوئی مؤقف نہیں دیا۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں