نئی دہلی : بھارت میں سمندری طوفان گلاب نے تین جانیں لے لیں، طوفان کی شدت بھارتی ریاست اڑیسہ اور آندھرا پردیش سے ٹکرانے کے بعد کم ہوگئی۔
اب تک کی تازہ ترین اطلاعات کے مطابق سمندری طوفان کے نتیجے میں دو ماہی گیروں سمیت ایک شہری ہلاک ہوگیا۔ 3ریاستوں کے ساحلی علاقوں سے2 لاکھ سے زائد افراد کو عارضی پناہ گاہوں میں کو منتقل کیا گیا۔
بھارت میں سمندری طوفان گلاب کی شدت میں کمی آگئی اور اب یہ طوفان ہوا کے کم دباؤ میں تبدیل ہو گیا ہے، آندھرا پردیش کے ساحلی علاقوں میں بھی تیز اور دیگر علاقوں میں معتدل بارش کی توقع ہے۔
گلاب بھارتی ریاستوں سے ٹکرایا تو پچانوے کلومیٹر فی گھنٹہ کی رفتار سے ہوائیں چل رہی تھیں۔ خلیج بنگال میں بننے والا یہ طوفان کل شام بھارتی ساحلوں سے ٹکرایا تھا۔
طوفان کی تباہ کاریوں سے بچنے کے لیے تین ریاستوں کے ساحلی علاقوں سے دو لاکھ سے زائد افراد کو منتقل کردیا گیا۔ ایسٹ کوسٹ ریلوے کی جانب سے طوفان گلاب کی وجہ سے چونتیس ٹرینوں کی روانگی کو منسوخ کر دیا گیا۔
سمندر میں ہوا کے کم دباؤ کے باعث ریاست تلنگانہ کے کئی حصوں میں تیز بارش ہوئی جس سے سڑکیں زیر آب آگئیں۔ بھارتی محکمہ موسمیات نے ریاست کے14 اضلاع میں مزید شدید بارشوں کا ریڈ الرٹ جاری کردیا ہے۔
