کراچی : کلفٹن کے علاقے سی ویو پر ایس ایچ او اور پولیس اہلکاروں سے بدتمیزی کرنے والا شخص پولیس نے گرفتار کرلیا بعد زاں عدالت نے ملزم کو ضمانت پر رہا کردیا۔
تفصیلات کے مطابق کلفٹن کے علاقے سی ویو پر ایس ایچ او اور پولیس اہلکاروں سے بدتمیزی کرنے والے وکیل شمس الاسلام ایڈووکیٹ کو گزشتہ رات ان کے گھر سے گرفتار کیا گیا تھا۔
ملزم کیخلاف مقدمہ درج کر کے اتوار کو علی الصبح اسپیشل مجسٹریٹ کی عدالت میں پیش کیا گیا، سندھ ہائیکورٹ کے وکیل خواجہ شمس الاسلام ایڈووکیٹ کو عدالت میں ہتھکڑیاں لگا کر پیش کیا گیا۔
اس موقع پر وکلاء کی بڑی تعداد بھی احاطہ عدالت میں موجود تھی جن کا کہنا تھا کہ گرفتاری غیر قانونی ہے مجسٹریٹ کی اجازت کے بغیر نہ گرفتاری کی جاسکتی ہے اور نہ ہی کسی کو گرفتار کیا جاسکتا ہے۔
سماعت کے دوران عدالت نے بغیر وارنٹ خواجہ شمس ایڈووکیٹ کے گھر میں داخل ہونے پر پولیس کی سرزنش کر تے ہوئے کہا کہ قابل ضمانت کیس میں مجسٹریٹ کی اجازت کے بغیر گرفتار کیوں کیا گیا؟
عدالت نے ایس ایچ او اور دیگر پولیس اہلکاروں کو شو کاز نوٹس جاری کرتے ہوئے خواجہ شمس الاسلام ایڈووکیٹ کو پچاس ہزار روپے کی ضمانت پر رہا کرنے کا حکم دیا۔
واضح رہے کہ کلفٹن کے علاقے سی ویو پر ایس ایچ او اور پولیس اہلکاروں سے بدتمیزی کی ویڈیو کا اعلیٰ حکام نے نوٹس لیا تھا۔
ملزم شمس الاسلام جعلی نمبرپلیٹ والی گاڑی چلارہا تھا، ایس ایچ او،اہلکاروں سےبدتمیزی کی ویڈیو سوشل میڈیا پروائرل ہوگئی تھی۔
میڈیا پر خبر نشر ہونے کے بعد اعلیٰ حکام نے واقعے کا نوٹس لیتے ہوئے پولیس کو ملزم کیخلاف سخت کارروائی کی ہدایت کی تھی۔
سی ویو: پولیس سے بدسلوکی کرنیوالے شخص کی شناخت، نمبر پلیٹ بھی جعلی نکلی
یاد رہے کہ شمس الاسلام کی کروڑوں روپے مالیت کی اسپورٹس کار کا نمبرآر8 تھا جو جعلی نمبر ہے، شہر کراچی میں چلنے والی 80 فیصد مہنگی گاڑیاں غیررجسٹرڈ ہوتی ہیں یا ان کی نمبر پلیٹس جعلی ہیں۔
