The news is by your side.

Advertisement

ہمارے پاس مکمل اختیارات ہیں، تمام ادارے تعاون کر رہے ہیں: سیکریٹری الیکشن کمیشن

اسلام آباد: سیکریٹری الیکشن کمیشن بابر یعقوب کا کہنا ہے کہ ہمارے پاس مکمل اختیارات ہیں، تمام ادارے تعاون کر رہے ہیں۔ واضح انداز میں کہہ رہا ہوں الیکشن کمیشن پر کسی کا دباؤ نہیں۔

تفصیلات کے مطابق سیکریٹری الیکشن کمیشن بابر یعقوب نے میڈیا سے گفتگو کرتے ہوئے کہا کہ انتخابی سامان کی بر وقت ترسیل یقینی بنائی جا رہی ہے، روشنائی ختم ہونے کی شکایات کا تدارک کر دیا ہے۔ الیکشن کے لیے ضروری سامان ریٹرننگ افسران کو بھجوا دیا۔

انہوں نے بتایا کہ پوسٹل بیلٹ کا غلط استعمال روکنے کے لیے مخصوص طریقہ اختیار کیا ہے۔ سی سی ٹی وی کیمروں کی تنصیب کا کام جاری ہے۔ الیکشن کے دن پولنگ اسٹیشن پر کیمروں سے مانیٹرنگ ہوگی۔ پولیس اورفوج سمیت 8 لاکھ اہلکار پولنگ اسٹیشن پر سیکیورٹی کے لیے تعینات ہوں گے۔

بابر یعقوب کا کہنا تھا کہ وزارت داخلہ نے 3 امیدواروں سے متعلق آگاہ کیا تھا۔ 3 افراد کو نوٹس دیا وہ کمیشن کے سامنے پیش ہو کر وضاحت دیں گے۔

انہوں نے کہا کہ سیکیورٹی اہلکار انتخابی ضابطہ اخلاق کے تحت کام کریں گے۔ چیف جسٹس سپریم کورٹ اور ہائی کورٹ کے چیف جسٹسز کے شکر گزار ہیں۔ ریٹرننگ افسران، ڈپٹی ریٹرننگ افسران ججز ہیں۔ عدلیہ کی جانب سے ججوں کی ڈیوٹی لگانے کی اجازت دی گئی۔

سیکریٹری الیکشن کمیشن نے کہا کہ الیکشن نہایت شفاف اور آئین کے مطابق ہوں گے۔ ووٹر ملک میں جمہوریت کے فروغ کے لیے اپنا فرض ضرور ادا کریں۔ الیکشن 2018 شفاف اور غیر جانبدار ہوں گے۔

انہوں نے کہا کہ پولنگ شروع اور ختم کروانا پریزائیڈنگ افسران کی ذمے داری ہے۔ عالمی مبصرین کو بھی الیکشن سے متعلق آگاہی دی ہے۔ پنجاب، اور پختونخواہ کے پولنگ اسٹیشن میں سہولتیں بہتر کردی گئی ہیں، سندھ اور بلوچستان کے پولنگ اسٹیشن میں بھی بہتری جاری ہے۔

بابر یعقوب کا کہنا تھا کہ تین دن میں 70 لاکھ ووٹرز نے ایس ایم ایس سروس سے معلومات لیں۔ پولنگ اسٹیشنز پر سیکیورٹی فوج اور پولیس کی ذمے داری ہوگی۔ آج گوگل میپ پر پولنگ اسکیم جاری کردیں گے۔ آر ٹی ایس نظام پر کام جاری ہے، 23 جولائی تک کام مکمل ہوجائے گا۔

انہوں نے کہا کہ تمام جماعتیں انتخابی مہم بھرپور طریقے سے چلا رہی ہیں۔ پنجاب کے وزیر اعلیٰ کو لکھا کہ کسی کو انتخابی مہم سے نہ روکا جائے۔ یہ بات غلط ہے کہ کسی جماعت کی انتخابی مہم کو روکا گیا ہے۔

انہوں نے کہا کہ بڑے بڑے حادثات ہوئے لیکن باوجود اس کے انتخابی مہم جاری ہے۔ یوسف رضا گیلانی کے بیٹے پر فائرنگ کا نوٹس لیا۔ الیکشن سے متعلق کوئی شک و شہبات نہیں ہونے چاہیئں۔ اگر کسی سے متعلق کوئی شک ہے تو وزارت داخلہ ہمیں بتائے، وزارت داخلہ کی فراہم معلومات کو دیکھ کر نوٹس لیا جائے گا۔

بابر یعقوب نے کہا کہ الیکشن صاف شفاف اور آئین کے مطابق ہوں گے۔ آر ٹی ایس نظام پر موصول نتیجہ پی ٹی وی کے ذریعے شیئر کریں گے۔ ہمارے پاس مکمل اختیارات ہیں، تمام ادارے تعاون کر رہے ہیں۔ واضح انداز میں کہہ رہا ہوں الیکشن کمیشن پر کسی کا دباؤ نہیں۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں