راولپنڈی: جنوبی وزیرستان کے علاقے سراروغہ میں دہشت گردوں سے جھڑپ کے دوران سکیورٹی فورسز کا ایک جوان شہید ہوگیا۔
فوج کے شعبہ تعلقات عامہ (آئی ایس پی آر) کے مطابق دہشت گردوں سے فائرنگ کے تبادلے میں حوالدار عمر حیات شہید ہوا۔
آئی ایس پی آر کا کہنا ہے کہ علاقے میں ممکنہ دہشت گردوں کے خاتمے کے لیے آپریشن جاری ہے۔
ترجمان کے مطابق پاک فوج دہشت گردی کے مکمل خاتمے کے لیے پُر عزم ہے، ہمارے جوانوں کی قربانیاں ہمارے عزم کو مزید مضبوط کرتی ہیں۔
خیال رہے کہ 26 ستمبر کو جنوبی وزیرستان کے علاقے اعظم ورسک میں سکیورٹی فورسز اور دہشت گردوں میں جھڑپ کے دوران دو جوان شہید اور ایک دہشت گرد ہلاک ہوا تھا۔
پاک فوج کے جوانوں کی مؤثر اور بروقت جوابی کارروائی میں ایک دہشت گرد مارا گیا، مارے گئے دہشت گرد سے اسلحہ اورگولیاں برآمد ہوئی ہیں۔
ہلاک ہونے والا دہشت گرد فورسز، بے گناہ شہریوں پر حملوں اور سنگین وارداتوں میں ملوث تھا۔
دونوں جانب سے فائرنگ کے تبادلے میں نائیک رشید اور سپاہی رسول بادشاہ نے جام شہادت نوش کیا۔
