کوئٹہ: سیکورٹی فورسز نے دہشت گردوں کے ٹھکانے پر چھاپہ مارتے ہوئے د و خودکش جیکٹس اور موٹرسائیکلوں میں نصب دوبموں سمیت دیگر اسلحہ اور بارود برآمد کرلیا جبکہ پولیس نے مختلف علاقوں میں کارروائیاں کرتے ہوئے گیارہ مطلوب ملزمان سمیت تیرہ افراد کو گرفتار کرلیا ہے۔
سیکورٹی ذرائع کے مطابق صوبائی دارلحکومت کے نواحی علاقے سریاب میں سیکورٹی فورسز نے حساس اداروں کی اطلاع پرکارروائی کرتے ہوئے دہشت گردوں کے ٹھکانے پر چھاپہ مارا۔
پولیس کارروائی کے دوران دہشت گردوں کے ٹھکانے سے دو خودکش جیکٹس، دو موٹرسائیکلوں میں نصب بم، 3 ایس ایم جیز، 70 کلو گرام دھماکہ خیز مواد سمیت دیگر تخریبی سامان قبضے میں لیا گیا ہے تاہم کوئی گرفتاری عمل میں نہیں آئی۔
دوسری جانب پولیس نے کوئٹہ کے مختلف علاقوں سریاب، گوالمنڈی اور سیٹلائٹ ٹاؤن میں کارروائیاں کرتے ہوئے 11 مطلوب ملزمان سمیت 13 افراد کو گرفتار کرلیا ہے۔ پولیس کے مطابق گرفتار ملزمان قتل، اقدامِ قتل اور ڈکیتیوں سمیت مختلف مقدمات میں مطلوب تھے، جنہیں تفتیش کے لیے منتقل کردیا گیا ہے۔
قبل ازیں بلوچستان میں بلوچ لبریشن آرمی براہمداغ بگٹی سے تعلق رکھنے والے 43 علیحدگی پسندوں نے ہتھیار پھینک کر قومی دھارے میں شامل ہونے کا اعلان کیا ہے، قومی دھارے میں شامل ہونے والے کمانڈر کا کہنا تھا کہ ’’ہم نے یہ فیصلہ برہمداغ کے بھارت سے تعلقات کی بنیاد پر کیا ہے‘‘۔
