راولپنڈی (3 اکتوبر 2025): سکیورٹی فورسز نے بلوچستان کے ضلع شیرانی میں خفیہ اطلاع پر کارروائی کرتے ہوئے 7 دہشتگردوں کو ہلاک کر دیا۔
فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے ضلع شیرانی میں انٹیلی جنس بیسڈ آپریشن کیا جس میں فائرنگ کے تبادلے میں 7 بھارتی اسپانسرڈ دہشتگرد مارے گئے۔
آئی ایس پی آر نے بتایا کہ آپریشن یکم اکتوبر کو دہشتگردوں کی موجودگی کی اطلاع پر کیا گیا تھا، دہشتگرد بھارتی پراکسی تنظیم فتنہ الخوارج سے تعلق رکھتے تھے، سکیورٹی فورسز اور دہشتگردوں کے درمیان شدید فائرنگ کا تبادلہ ہوا۔
یہ بھی پڑھیں: بلوچستان میں سیکیورٹی فورسز کی کارروائیاں، 13 فتنہ الخوارج ہلاک
آپریشن کے دوران دہشتگردوں سے اسلحہ، گولہ بارود اور دھماکا خیز مواد برآمد کیا گیا، ہلاک دہشتگرد علاقے میں متعدد کارروائیوں میں ملوث تھے، علاقے میں کلیئرنس اور سینی ٹائزیشن آپریشن جاری ہے۔
آئی ایس پی آر نے کہا کہ سکیورٹی فورسز نے بھارتی سرپرستی میں ہونے والی دہشتگردی کے خاتمے کے عزم کا اعادہ کیا، پاکستان کی افواج دہشتگردوں کو انصاف کے کٹہرے میں لانے کیلیے پُرعزم ہیں۔
یکم اکتوبر کو سکیورٹی فورسز نے کوئٹہ میں بھارتی پراکسی فتنہ الخوارج اور فتنہ الہندوستان کے خلاف انٹیلیجنس بیسڈ آپریشن کے دوران فائرنگ کے تبادلے میں 10 دہشتگرد ہلاک کیے تھے۔
آئی ایس پی آر نے بتایا تھا کہ مارے گئے دہشتگردوں سے اسلحہ، گولہ بارود اور دھماکا خیز مواد برآمد کیا گیا، ہلاک دہشتگرد متعدد تخربی کارروائی میں ملوث رہے تھے۔
لئیق الرحمن دفاعی اور عسکری امور سے متعلق خبروں کے لئے اے آروائی نیوز کے نمائندہ خصوصی ہیں