اسلام آباد : چیئرمین سینیٹ کا انتخاب آج تین بجے خفیہ ووٹنگ سے ہوگا، حکومتی امیدوار صادق سنجرانی اور اپوزیشن کے امیدوار یوسف رضا گیلانی میں کانٹے کا مقابلہ متوقع ہیں۔
تفصیلات کے مطابق ایوان بالا میں چیئر مین اور ڈپٹی چیئرمین کا انتخاب آج ہوگا ، چیئرمین سینیٹ کیلئے حکومتی امیدوار صادق سنجرانی اور اپوزیشن کے امیدوار یوسف رضا گیلانی جبکہ ڈپٹی چیئرمین سینیٹ کے لیے پی ڈی ایم کے عبد الغفور حیدری اور حکومت کے مرزا محمد آفریدی میں کانٹے کا مقابلہ متوقع ہیں۔
چیئرمین سینیٹ کاانتخاب تین بجے خفیہ ووٹنگ سے ہوگا ، نئے چیئرمین منتخب ہونے کے بعد ڈپٹی چیئرمین کے لیے ووٹنگ کرائی جائے گی۔
نومنتخب سینیٹرز بھی آج حلف اٹھائیں گے، جی ڈی اے کے مظفر حسین شاہ سینیٹ کے اجلاس کی صدارت کریں گے اور نومنتخب سینیٹرز سے حلف لیں گے۔
حکومتی و اتحادی سینیٹرز کی پارلیمنٹ ہاؤس آمدکاسلسلہ جاری ہے ، سینیٹ کی لابی میں حکومتی واتحادی سینیٹرز کیلئے ناشتے کا اہتمام
کیا گیا ہے ، سینیٹر شہزاد وسیم، بیرسٹرعلی ظفر،اعجازچوہدری اور سیف اللہ نیازی پہنچ گئے۔
اپوزیشن اراکین میں رضاربانی، شیری رحمان، سعدیہ عباسی و دیگر پارلیمنٹ ہاؤس پہنچ گئے، کمیٹی روم نمبر 2 میں اراکین کے لئے ناشتے کا اہتمام کیا گیا ہے۔
خیال رہے چیئرمین سینیٹ بننےکےلیےکم ازکم 51ووٹ درکار ہیں ، نمبر گیم میں اپوزیشن اکیاون ووٹ کے ساتھ آگے ہے، حکومتی اتحاد کے پاس اڑتالیس ووٹ ہیں جبکہ جماعت اسلامی نے اکلوتا ووٹ کسی کونہ دینے کا اعلان کیا ہے۔
