اسلام آباد : پیپلزپارٹی کے رہنما سینیٹر سعید غنی نے کہا ہے کہ عمران خان کےاسپتال میں عالمی دہشت گردوں کا علاج ہوا، چیئرمین پی ٹی آئی خود ایک ذہنی مریض ہیں۔
ان خیالات کا اظہار انہوں نے چیئرمین تحریک انصاف کے خطاب پر اپنا ردعمل دیتے ہوئے کیا۔ سینیٹرسعید غنی نے عمران خان کو شدید تنقید کا نشانہ بناتے ہوئے کہا کہ عمران نیازی کے والد اکرام نیازی کو پیپلزپارٹی کی حکومت نے کرپشن کے الزام میں نوکری سے فارغ کیا گیا تھا اورعمران نیازی کو اسی بات کا غصہ ہے۔
ان کا کہنا تھا کہ پیپلزپارٹی سےدشمنی میں عمران خان اور نوازشریف ایک ہیں۔ عمران خان قوم کو بتائیں کہ کیا وہ بھارتی وزیر اعظم نریندرمودی سے چندہ لینے گئے تھے؟
واضح رہے کہ چیئرمین پی ٹی آئی عمران خان نے سندھ حکومت پر کڑی تنقید کرتے ہوئے کہا ہے کہ آئی جی سندھ اے ڈی خواجہ کو غلط کام نہ کرنے کی وجہ سے سندھ حکومت نے ہٹایا۔
آج چکوال تلہ کنگ میں جلسہ عام سے خطاب کرتے ہوئے عمران خان کا کہنا تھا کہ آصف زرداری کی واپسی پر 5 ارب روپے کی کرپشن کرنے والے شرجیل میمن کو رہائی ملی۔
اس کے علاوہ ڈاکٹرعاصم کو 460 ارب روپے کی کرپشن کے باوجود ضمانت مل گئی، ملک کی دو بڑی جماعتوں نے نام نہاد جمہوریت کو بچانے کے لیے ایک بار پھر مک مُکا کرلیا ہے۔
