کراچی: معروف قانون دان اور سابق وزیر قانون شریف الدین پیرزادہ 94 برس کی عمر میں انتقال کرگئے، وہ کافی عرصے سے علیل تھے۔
تفصیلات کےمطابق پاکستان کے نامور قانون دان سید شریف الدین پیرزادہ کراچی میں انتقال کر گئے ہیں ۔وہ کافی عرصے سے علیل اور زیر علاج تھے۔
شریف الدین پیر زادہ کے انتقال کے باعث سندھ ہائی کورٹ میں عدالتی کارروائی ملتوی کردی گئی اور تمام بورڈ ڈسچارج کردیے گئے۔
معروف قانون دان شریف الدین پیر زادہ 12 جون 1923 کو ہندوستانی ریاست مدھیہ پردیش کے شہر برہان پور میں پیدا ہونے والے سید شریف الدین پیرزادہ نے لنکنز اِن کالج سے بار ایٹ لاء کیا اور 1945 میں بمبئی یونیورسٹی سے قانون کی ڈگری حاصل کی۔
شریف الدین پیرزادہ کئی اہم حکومتی عہدوں پر فائز رہے،انہوں نے اٹارنی جنرل اور وفاقی وزیر قانون کی حیثیت سے بھی خدمات انجام دیں۔
واضح رہےکہ معروف قانون دان 1985 تا 1988 تک اسلامی ممالک کی تنظیم او آئی سی کے سیکریٹری جنرل بھی رہے۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں
