کرکٹ آسٹریلیا نے فاسٹ بولر مائیکل نیسر کے زخمی ہونے کے بعد پاکستان کے خلاف ٹیسٹ سیریز کے لیے متبادل کھلاڑی کا اعلان کردیا ہے۔
کرکٹ آسٹریلیا نے اس خبر کی تصدیق کی ہے کہ پاکستان کیخلاف 3میچوں کی ٹیسٹ سیریز کے لیے اعلان کردہ ٹیسٹ اسکواڈ میں شامل فاسٹ بولر مائیکل نیسر پٹھوں میں کھچاؤ کے باعث سیریز سے باہر ہوگئے ہیں اور اس کی جگہ مارک اسٹیکٹی کو ٹیم میں شامل کیا گیا ہے۔
کرکٹ آسٹریلیا نے مزید ایک فاسٹ بولر برینڈن ڈوگیٹ اور آل راؤنڈر شان ایبٹ کو بھی ٹیسٹ سیریز کے لیے اسٹینڈ بائی پلیئرز کے طور پر ٹیم میں ساتھ رکھنے کا فیصلہ کیا ہے۔
آسٹریلوی بورڈ کے مطابق مائیکل نیسر کی جگہ ٹیم میں شامل مارک اسٹیکٹی آسٹریلوی اسکواڈ میں شامل ہونے سے قبل وکٹوریہ کیخلاف اس ہفتے شیفلڈ شیلڈ میچ کھیلیں گے۔
واضح رہے کہ نیو ساؤتھ ویلز کے خلاف پیر کے روز کوئنز لینڈ کے مارش ون ڈے کپ میچ میں نیسر کے پٹھوں میں کچھاؤ آیا تھا جس کی وجہ سے وہ دورہ پاکستان سے باہر ہوگئے ہیں۔ فروری 2015 میں تسمانیہ کے خلاف کوئنز لینڈ کے لےی فرسٹ کلاس کرکٹ ڈیبیو کرنے والے اسٹیکٹی نے اپنے فرسٹ کلاس کیریئر میں51 میچوں میں 25.67 کی اوسط سے 182 وکٹیں حاصل کر رکھی ہیں۔
انہوں نے رواں شیفلڈ شیلڈ ٹورنامنٹ میں بھی 16.31 کی شاندار اوسط سے 29 وکٹیں حاصل کررکھی ہیں، دوسری جانب ڈوگیٹ نے اس سیزن میں فرسٹ کلاس کرکٹ میں 21.45 کی اوسط سے 11 وکٹیں حاصل کی ہیں وہ گزشتہ سال مئی یں جنوبی آسٹریلیا میں جانے سے پہلے شیفلڈ شیلڈ ٹورنامنٹ جیتنے والے کوئنز لینڈ سیٹ اپ کا حصہ بھی تھے۔
دورہ پاکستان کے لیے آسٹریلیا کی ٹیم ان کھلاڑیوں پر مشتمل ہے۔
پیٹ کمنز (کپتان)، اسٹیون اسمتھ (نائب کپتان)، ڈیوڈ وارنر، ایشٹن اگر، اسکاٹ بولانڈ، ایلکس کیری (وکٹ کیپر)، کیمرون گرین، مارکس ہیرکس، جوش ہیزل ووڈ، ٹریوس ہیڈ، جوش انگلس، عثمان خواجہ، مارنس لابوشین، ناتھن لیون، مشل مارش، مچل اسٹارک، مارک اسٹیکٹی اور مچل سویپسن۔
