واشنگٹن: امریکا میں اخبار کے نیوز روم میں نامعلوم شخص کی فائرنگ کے نتیجے میں پانچ افراد ہلاک اور متعدد زخمی ہوگئے۔
تفصیلات کے مطابق یہ واقعہ امریکی ریاست میری لینڈ میں پیش آیا جہاں مقامی اخبار کے نیوز روم میں نامعلوم شخص نے فائرنگ کردی جس کے باعث کئی افراد ہلاک اور متعدد زخمی ہوگئے۔
امریکی میڈیا کا کہنا ہے کہ امریکی ریاست میری لینڈ کے دار الحکومت ’اینا پولس‘ میں قائم مقامی روزنامہ اخبار ’کیپٹل گزٹ‘ کے دفتر پر فائرنگ ہوئی جس کی وجہ سے پانچ ہلاکتوں کا خدشہ ہے، پولیس کی جانب سے جائے وقوعہ پر کارروائی کی جارہی ہے۔
گزٹ کے رپورٹر ڈیوس کا کہنا ہے کہ نامعلوم شخص نے دفتر میں شیشے کے بنے دروازے کے باہر سے فائرنگ کی جس کے باعث متعدد افراد موقع پر ہی ہلاک ہوگئے جبکہ کئی زخمی ہیں جن کی حالت تشویش ناک ہے۔
شاپنگ مال میں فائرنگ کا منصوبہ، 17 سالہ نوجوان گرفتار
اپنی ذاتی رائے کا اظہار کرتے ہوئے ان کا کہنا تھا کہ اس سے زیادہ خطرناک لمحات کیا ہوسکتے ہیں کہ جب ہمارے سامنے ایک شخص کھڑا فائرنگ کر رہا ہے، اور ہم خود کو بچانے کے لیے ادھر ادھر چھپ رہے ہیں۔
گورنر میری لینڈ ’لیری ہوگن‘ کی جانب سے جاری کردہ بیان میں لوگوں سے مطالبہ کیا گیا ہے کہ وہ کسی بھی قسم کے خطرات کے پیش نظر جاعے وقوعہ سے دور رہیں، اور اس واقعہ میں ہلاک اور زخمی ہونے والوں کے لیے دعا کریں۔
امریکا: اسکول میں طالب علم کی فائرنگ، ٹیچر سمیت ایک طالبہ زخمی
دوسری جانب پولیس نے مذکورہ اخبار کے دفتر کو خالی کرا لیا ہے جہاں سرچ آپریشن کا عمل جاری ہے، جبکہ پولیس نے حملہ آور کو گرفتار کرنے کے بعد ابتدائی طور پر بتایا ہے کہ حملہ آور شارپ شوٹر ہے۔
علاوہ ازیں امریکی صدر ڈونلڈ ٹرمپ واقعہ کی اطلاع ملنے پر وسکانس کا دورہ ملتوی کر کے وائٹ ہاؤس پہنچ گئے اور تازہ ترین صورت حال سے آگاہی حاصل کی جبکہ میری لینڈ میں فائرنگ کے بعد مختلف شہروں میں حفاظتی انتظامات سخت کردیے گئے ہیں۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
