ایف آئی اے امیگریشن نے جناح انٹر نیشنل ایئرپورٹ کراچی میں مختلف کارروائیاں کرتے ہوئے بیرون ممالک سے آنے والے متعدد پاکستانیوں کو گرفتار کرلیا۔
اس حوالے سے ایف آئی اے حکام کا کہنا ہے کہ غیر قانونی امیگریشن اور انسانی اسمگلنگ میں ملوث متعدد مسافروں کو حراست میں لیا گیا ہے۔
ایف آئی اے کے مطابق امیگریشن کلیئرنس کے دوران متعدد مشکوک مسافروں کو روکا گیا، اس دوران راشد نامی مسافر کو عراق سے ڈی پورٹ ہونے پر حراست میں لیا گیا۔
ترجمان ایف آئی اے کا کہنا ہے کہ دستاویزات کی جانچ پڑتال کے بعد معلوم ہوا کہ مسافر راشد کے اصل پاسپورٹ سے متعدد صفحات نکالے گئے تھے۔
اس کے علاوہ عاطف رحمان نامی مسافر ترکیہ سے پاکستان پہنچا تھا، مسافر عاطف ٹرانزٹ ویزے پر ترکیہ 8 ماہ غیرقانونی طور پر مقیم رہا۔
دیگر 3 مسافروں کو ترکیہ سے ڈی پورٹ کیا گیا، مذکورہ مسافر ایران سے غیرقانونی طور پر زمینی راستوں سے یورپ جارہے تھے۔
ایف آئی اے حکام کا کہنا ہے کہ مسافرعمیر خان جرمنی سے پاکستان پہنچا تھا، عمیر نے ایران اور ترکیہ کے راستے یورپ جانے کا اعتراف کیا۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں