اسلام آباد : سابق چیئرمین ایف بی آر شبر زیدی نے کہا ہے کہ خدشہ ہے کہ آٹا200روپے کلو سے تجاوز کرجائے گا، ہم انسانی اسمگلنگ کا سب سے بڑا مرکز بن گئے ہیں۔
یہ بات انہوں نے اے آر وائی نیوز سے خصوصی گفتگو کرتے ہوئے کہی، انہوں نے کہا کہ جنیوا کی کانفرنس سے مجھے نقد رقم ملنے کی بہت زیادہ امید نہیں ہے، وہ کانفرنس ہم نے سیلاب متاثرین کے لیے رکھی ہے۔
شبرزیدی کا کہنا تھا کہ جنیوا کانفرنس میں کیا ہورہا ہے اس سے عوام کو کوئی فرق نہیں پڑتا، آٹا 160روپے کلو مل رہا ہے جس سے عوام کو فرق پڑتا ہے، بھارت میں اس وقت آٹا36روپے کلو مل رہا ہے، خدشہ ہے کہ یہاں آٹا200روپے کلو سے تجاوز کرجائے گا۔
انہوں نے کہا کہ آئی ایم ایف سے ڈیڈلاک ختم ہونے میں پیش رفت ہوسکتی ہے، زیادہ سے زیادہ کچھ قرضوں کی اقساط آگے بڑھیں گی جو ہمار ےمعاشی بحران کا حل نہیں ہے۔
In India fine quality Atta is available at 39 Indian Rupee per Kg.Even if $ parity is accounted for Atta is extremely expensive in Pakistan.There is no harm in accepting that we all have collectively failed.Correction, whatever can only be made once we get out of denial mindset.
— SyedShabbarZaidi (@SShabbarZaidi) January 8, 2023
ایک سوال کے جواب میں شبر زیدی نے بتایا کہ جرمنی نے600پاکستانیوں کے ویزے منسوخ کردیے ہیں، جرمنی کا کہنا ہے کہ ان کو ویزے دیے تو واپس نہیں جائیں گے۔
ان کی نظر میں ہمارے ملک کے حالات خراب ہیں، ہم ناکام ریاست ہیں، ملک کے سارے لوگ بیٹھ کر یہ اعلان کردیں کہ ہم ناکام ریاست ہیں، اور اس ریاست کو درست کرنے کے لیے اقدامات کریں گے، ایسا کرنے سے پوری قوم کو مل کر بحران سے نکلنا ہوگا۔
سابق چیئرمین ایف بی آر نے کہا کہ مجھے بتایا گیا تھا کہ ہمارے شہروں سے انسانی اسمگلنگ ہورہی ہے، ہم انسانی اسمگلنگ کا سب سے بڑا مرکز بن گئے ہیں، ہماری وزارتیں کام نہیں کرتیں تو انسانی اسمگلنگ ہوتی ہے۔
شبرزیدی کا کہنا تھا کہ پی ٹی آئی اور پی ڈی ایم کی معاشی پالیسی میں فرق نہیں صرف نیت میں فرق ہے، معاشی پالیسی دونوں کی ایک ہے لیکن دونوں کی نیت میں فرق ہے۔
ان کا مزید کہنا تھا کہ پہلے پی ٹی آئی معیشت کیلئے فیصلے کرتی تھی پی ڈی ایم کھڑی ہوجاتی تھی، اب پی ڈی ایم فیصلے کرتی ہے تو پی ٹی آئی نہیں مانتی۔
