قومی کرکٹ ٹیم سے باہر ہونے والے آل راؤنڈر شاداب خان نے واپسی کے لیے اپنے سسر اور لیجنڈ بولر ثقلین مشتاق کی خدمات حاصل کرلیں۔
شاداب خان طویل عرصے سے قومی ٹیم سے باہر ہیں اور وہ پھر سے اپنی لیگ اسپن بولنگ کی دھاک بٹھانے کیلئے سُسر ثقلین مشتاق کی خدمات لے رہے ہیں جس کی ویڈیو سوشل میڈیا پر وائرل ہورہی ہے، شاداب خان اپنی بولنگ کو کارگر بنانے کے لیے محنت کرتے نظر آئے۔
انسٹاگرام پر آل راؤنڈر نے اپنے سُسر اور سابق لیجنڈ آف اسپن بولر ثقلین مشتاق سے بولنگ کی کوچنگ کی تصاویر و ویڈیو شیئر کی ہیں۔
شاداب خان کی جانب سے شیئر کی گئی فوٹیج میں ثقلین مشتاق کو شاداب خان کی کوچنگ کرتے دیکھا جاسکتا ہے، شاداب خاب بولنگ کرتے ہوئے نظر آرہے ہیں۔
شیئر کی گئی ویڈیو کے کیشن میں قومی ٹیم سے کافی عرصے سے باہر آل راؤنڈر شاداب خان نے لکھا کہ اس شخص سے سیکھ رہا ہوں جو سب سے بہترین ہیں میں اس کے لیے شکرگزار ہوں۔
پاکستان کے سابق کوچ ثقلین مشتاق نے شاداب کو ایک ہاتھ سے بولنگ کی پریکٹس بھی کروائی جبکہ بولنگ بہتر کرنے کیلئے انھوں نے شاداب کو ٹپس بھی دیں۔
