The news is by your side.

Advertisement

شاداب خان نے اپنی نصف سنچری مرحوم منصور احمد کے نام کردی

ڈبلن: پاکستان اور آئرلینڈ کے درمیان جاری ٹیسٹ میچ میں لیگ اسپنر شاداب خان نے نصف سنچری اسکور کی جو انہوں نے ہاکی کے گول کیپر مرحوم منصور احمد کے نام کردی ہے۔

ان خیالات کا اظہار انہوں نے سماجی رابطے کی ویب سائٹ ٹویٹر پر اپنے پیغام میں کیا، لیگ اسپنر شاداب خان کا کہنا تھا کہ ہمیں قومی ہیروز کی قدر کرنی چاہئے اللہ تعالیٰ منصور احمد کو اپنے جوار رحمت میں اعلیٰ مقام دے۔

واضح رہے کہ گزشتہ روز ڈبلن ٹیسٹ شاداب خان نے ایسے موقع پر 55 رنز کی شاندار اننگز کھیلی جب قومی ٹیم مشکلات کا شکار تھی تاہم پاکستان نے اپنی پہلی اننگز 310 رنز پر ڈیکلیئر کردی ہے۔

خیال رہے کہ این آئی سی وی ڈی میں زیر علاج قومی ہاکی ٹیم کے سابق گول کیپر منصور احمد گزشتہ روز کراچی میں طویل علالت کے بعد انتقال کرگئے تھے وہ عارضہ قلب میں مبتلا تھے۔

ایک روز قبل منصور احمد کی اچانک طبیعت خراب ہوئی جس کے بعد ڈاکٹرز نے انہیں انتہائی نگہداشت وارڈ میں داخل کیا اور جان بچانے کی ہر ممکن کوشش کی مگر وہ جانبر نہ ہوسکے۔

منصور احمد نے 1986 سے 2000 تک قومی ہاکی ٹیم میں بحیثیت گول کیپر بہترین کارکردگی کا مظاہرہ کیا، اپنے کیریئر میں منصوراحمد نے 338 عالمی میچز کھیلے اور ایک وقت میں منصور احمد کو ایشیاء کے نمبر ون گول کیپر ہونے کا اعزاز بھی حاصل رہا، اولمپکس کھیلتے ہوئے آپ نے متعدد سلور اور گولڈ میڈلز اپنے نام کئے۔


خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں