The news is by your side.

Advertisement

پاکستان ٹیلی ویژن کے معروف اداکار شفیع محمد شاہ کی برسی

پاکستان ٹیلی وژن کے معروف اداکار شفیع محمد شاہ 17 نومبر 2007ء کو کراچی میں وفات پاگئے تھے۔ آج ان کی برسی ہے۔ ٹیلی ویژن پر یادگار کرداروں کے ساتھ ان کے متعدد ڈرامے بہت مقبول ہوئے۔ شفیع محمد شاہ نے اردو اور سندھی فلموں میں بھی اداکاری کی۔

1948ء میں کنڈیارو میں پیدا ہونے والے شفیع محمد شاہ نے سندھ یونیورسٹی سے بین الاقوامی تعلقات میں ایم اے کا امتحان پاس کیا اور ایک زرعی بینک میں ملازم ہوگئے۔ ان کا دھیما لہجہ اور خوب صورت آواز انھیں ریڈیو پاکستان تک لے گئی جہاں وہ صدا کاری کے جوہر دکھانے لگے۔

اس دنیا میں‌ قدم رکھنے کے بعد انھوں نے ملازمت ترک کی اور لاہور چلے گئے جہاں اداکار محمد علی نے فلم کورا کاغذ میں ایک کردار دلوا دیا۔ اسی زمانے میں ٹیلی وژن کے نہایت قابل اور نام ور پروڈیوسر شہزاد خلیل نے انھیں اپنے ڈرامے اڑتا آسمان میں‌ ایک کردار کی پیش کش کی اور یوں ٹی وی پر کام ملنے کا سلسلہ شروع ہو گیا۔شفیع محمد شاہ کی وجہِ‌ شہرت سیریل تیسرا کنارا بنا۔ لاہور میں متعدد فلموں میں کام کرنے کے بعد وہ کراچی آگئے۔

شفیع محمد شاہ کے مشہور ٹیلی وژن ڈراموں میں آنچ، چاند گرہن، جنگل، دائرے، تپش، کالا پل، ماروی شامل ہیں۔

انھوں نے سیاست کی دنیا میں بھی قدم رکھا اور پاکستان پیپلز پارٹی پارلیمنٹیرینز کے ٹکٹ پر قومی اسمبلی کے لیے انتخابی معرکے میں‌ شکست سے دوچار ہوئے۔ یہ 2002ء کی بات ہے۔

پی ٹی وی کے مقبول اداکار کو حکومتِ پاکستان نے صدارتی تمغہ برائے حسنِ کارکردگی سے نوازا اور بعد از مرگ ستارۂ امتیاز ان کے نام کیا۔

Comments

یہ بھی پڑھیں