اسلام آباد: وزیر خارجہ شاہ محمود قریشی شنگھائی تعاون تنظیم اجلاس میں شرکت کے لیے تاجکستان روانہ ہوگئے جہاں وہ اپنے خطاب میں علاقائی تعاون کے لیے وزیر اعظم کے وژن سے آگاہ کریں گے۔
تفصیلات کے مطابق وزیر خارجہ شاہ محمود قریشی 2 روزہ دورے پر تاجکستان روانہ ہوگئے۔ وزیر خارجہ شنگھائی تعاون تنظیم اجلاس میں پاکستانی وفد کی سربراہی کریں گے۔
شنگھائی تعاون تنظیم (ایس سی او) سربراہان حکومت کونسل کا 17 واں اجلاس 11 اور 12 اکتوبر کو ہوگا، پاکستان کے مکمل رکن بننے کے بعد سربراہان حکومت کونسل کا دوسرا اجلاس ہے۔
اجلاس میں وزیر خارجہ اپنے خطاب میں علاقائی تعاون کے لیے وزیر اعظم کے وژن سے آگاہ کریں گے۔ وزیر خارجہ خطے سے غربت کے خاتمے کے لیے ایس سی او کے ممکنہ کردار پر بات کریں گے۔ وزیر خارجہ رکن ممالک کے درمیان معاشی تعاون کی اہمیت پر بھی روشنی ڈالیں گے۔
شاہ محمود قریشی حکومتی معاشی پالیسیوں کے بارے میں بھی آگاہ کریں گے، وزیر خارجہ خطے کو درپیش چیلنجز سے مشترکہ طور پر نمٹنے کی ضرورت پر زور دیں گے جبکہ وزیرخارجہ مختلف ملکوں کے رہنماؤں سے اہم دو طرفہ ملاقاتیں بھی کریں گے۔
خیال رہے کہ شنگھائی تعاون تنظیم کے 8 مستقل اور 4 مبصر ملک رکن ہیں، سربراہی اجلاس میں تعاون کے فروغ اور ترقی کے امکانات پر بات چیت ہوگی۔ اجلاس میں تجارت، معاشی تعاون اور علاقائی معاشی روابط بھی زیر غور آئیں گے۔
