اسلام آباد : وزیر خارجہ شاہ محمود قریشی نے کہا ہے کہ مودی سرکار خطرناک کھیل کھیل رہی ہے، افواج پاکستان نے بھارتی اشتعال انگیزی کا بھرپور جواب دیا۔
یہ بات انہوں نے اے آر وائی نیوز سے خصوصی گفتگو کرتے ہوئے کہی، شاہ محمود قریشی نے کہا کہ
بھارت ایک مخمصے میں پھنس چکا ہے اور اس سے نکلنے کیلئے بہانے تلاش کررہا ہے۔
انہوں نے کہا کہ جنوری 2019 سے اب تک 3 ہزار بار لائن آف کنٹرول کی خلاف ورزی کی جا چکی ہے، آزاد کشمیر میں خواتین اور بچوں سمیت300کے قریب نہتے افراد کو نشانہ بنایا گیا۔
شاہ محمود قریشی کا کہنا تھا کہ نریندر مودی کو باور کروانا چاہتا ہوں کہ ہم پر امن لوگ ہیں لیکن27 فروری کو مت بھولیے گا، ہم پرُ امن لوگ ہیں لیکن ہماری امن کی خواہش کو ہماری کمزوری نہ سمجھا جائے۔
لائن آف کنٹرول افواج پاکستان نے بھارتی اشتعال انگیزی کا بھرپور جواب دیا ہے، مودی سرکار خطرناک کھیل کھیل رہی ہے، بھارت ایک مخمصے میں پھنس چکا ہے وہ اب بہانے تلاش کررہا ہے۔
بھارت اپنی اندرورنی صورتحال کے باعث کچھ بھی کرسکتا ہے، بھارت کو کسی بھی جارحیت کا بھرپور جواب دیا جائے گا، دنیا کو بھی بھارتی اشتعال انگیزی کا نوٹس لینا چاہیے۔
مزید پڑھیں: لائن آف کنٹرول پر بھارت کی اشتعال انگیزی، پاک فوج کا بھر پور جواب
شاہ محمود قریشی نے بھارت کو خبردار کرتے ہوئے کہا کہ اگر حملہ آور ہونے کی کوشش کی گئی تو پاکستانی افواج تیار ہیں، ہر جارحیت کا بروقت اور مناسب جواب دیا جائے گا کیونکہ پوری قوم افواج پاکستان کے ساتھ ہے۔
