برلن: وزیر خارجہ شاہ محمود قریشی جرمنی پہنچ گئے، ایئرپورٹ پر پاکستانی سفارتخانے کے سینئر حکام نے استقبال کیا۔
تفصیلات کے مطابق شاہ محمودقریشی کا میونخ ایئرپورٹ پر پاکستانی سفارتخانے کے اعلیٰ عہدیداروں نے استقبال کیا، وزیر خارجہ جرمنی میں عالمی سیکیورٹی کانفرنس میں پاکستان کی نمائندگی کریں گے۔
وزیرخارجہ شاہ محمودقریشی کی افغان صدراشرف غنی سے ملاقات بھی متوقع ہے، ان کی میونخ میں 19 امریکی ارکان پارلیمنٹ سے بھی ملاقات ہوسکتی ہے۔
شاہ محمود سے روس، کینیڈا، جرمنی اور ازبکستان کے وزرائے خارجہ سےبھی ملاقاتیں ہوں گی۔
یاد رہے کہ گزشتہ ہفتے وزیرخارجہ شاہ محمود قریشی، وفاقی وزیر برائے انسانی حقوق شیریں مزاری سمیت متعدد رہنماؤں نے افغان صدر اشرف غنی کی جانب سے پاکستان کے اندورنی معاملات پرتبصرے پر شدید تحفظات کا اظہار کیا تھا۔
وزیرخارجہ شاہ محمود قریشی کی عمانی ہم منصب سے ملاقات، دورہ پاکستان کی دعوت
وزیرخارجہ شاہ محمود قریشی نے افغان صدر کی ٹویٹ کو سختی سے مسترد کرتے ہوئے کہا تھا کہ ایسے غیر ذمہ دارانہ بیانات ہمارے معاملات میں مداخلت کے مترادف ہیں، افغان قیادت کو چاہیے کہ افغان عوام کے دیرینہ مسائل اور مصائب پر توجہ دے۔
قبل ازیں وزیرخارجہ شاہ محمود قریشی نے رواں سال جنوری میں عمان کا دورہ کیا تھا، عمانی ہم منصب یوسف بن علوی سے ملاقات میں انہوں نے دورہ پاکستان کی دعوت دی تھی، وزیرخارجہ نے کہا تھا کہ عوامی سطح پر روابط کے فروغ کے لیے فرینڈ شپ گروپ کو فعال کیا جائے گا۔
