The news is by your side.

Advertisement

تاریخ گواہ ہے جب جب پاکستانی قوم جاگی اسے کوئی جھکا نہیں سکا: وزیر خارجہ

کراچی: وزیر خارجہ شاہ محمود قریشی کا کہنا ہے کہ آج کے احتجاج سے نہتے کشمیریوں کو واضح پیغام گیا ہے، تاریخ گواہ ہے جب جب پاکستانی قوم جاگی اسے کوئی جھکا نہیں سکا۔

تفصیلات کے مطابق وزیر خارجہ شاہ محمود قریشی سندھ کے 2 روزہ دورے پر کراچی پہنچ گئے، وزیر خارجہ کل دوپہر عمر کوٹ میں جلسے سے خطاب کریں گے۔

کراچی آمد پر وزیر خارجہ نے جناح انٹرنیشنل ایئرپورٹ پر میڈیا سے گفتگو کرتے ہوئے کہا کہ سب سے پہلے میں پوری پاکستانی قوم کا شکریہ ادا کروں گا، قوم نے وزیر اعظم کی کال پر کشمیریوں سے یکجہتی کا مظاہرہ کیا۔ ہر شہر، ہر قصبے اور ہر صوبے سے اطلاعات حوصلہ افزا ہیں۔ آج کے احتجاج سے نہتے کشمیریوں کو واضح پیغام گیا ہے۔

وزیر خارجہ نے کہا کہ قوم کشمیریوں کے ساتھ جدوجہد میں شانہ بشانہ کھڑی ہے، بے شک ذمہ داریوں میں اضافہ ہوا لیکن اللہ مدد کرنے والا ہے۔ تاریخ گواہ ہے جب جب پاکستانی قوم جاگی اسے کوئی جھکا نہیں سکا۔ قیادت کا فرض ہوتا ہے قوم کو حقائق بتائے اور ہم آگاہ کر رہے ہیں۔ ہم دنیا بھر کے سامنے بھارت کا فاشسٹ چہرہ بے نقاب کر رہے ہیں۔

انہوں نے کہا کہ پاکستانی، کشمیری اور سکھ مودی سرکار کے خلاف احتجاج کر رہے ہیں۔ وقت کے ساتھ ساتھ احتجاجی مظاہروں میں اضافہ ہو رہا ہے۔ ہمیں فکر ہے تو کشمیریوں کے ساتھ ہونے والے ناروا سلوک کی ہے۔

وزیر خارجہ کا کہنا تھا کہ مقبوضہ کشمیر میں ظلم کی کہانیاں منظر عام پر آرہی ہیں، کرفیو ہٹانے کے بعد مظلوم کشمیریوں پر مظالم کی کہانیاں سامنے آئیں گی۔ کشمیریوں کو جبر و تشدد سے دبا لیں گے تو یہ بھارت کی خام خیالی ہے۔ بھارت کشمیریوں کو جتنا دبائے گا یہ جدوجہد اتنی زیادہ ابھرے گی۔

Comments

comments

یہ بھی پڑھیں