The news is by your side.

Advertisement

پاکستان ملائشیا کے ساتھ تعلقات کو انتہائی قدر کی نگاہ سے دیکھتا ہے، شاہ محمود قریشی

کوالا لمپور : وزیر خارجہ شاہ محمود قریشی نے کہا ہے کہ پاکستان ملائشیا کے ساتھ تعلقات کو انتہائی قدر کی نگاہ سے دیکھتا ہے، دونوں ملکوں کے وزرائے اعظم کے دوروں نے تعلقات کو مزید تقویت دی۔

ان خیالات کا اظہار انہوں نے ملائیشین نائب وزیر خارجہ احمد مرزوقی کی جانب سے اپنے اعزاز میں دیئے گئے عشائیے سے خطاب کرتے ہوئے کیا۔

تفصیلات کے مطابق وزیر خارجہ شاہ محمود قریشی جو ان دنوں ملائیشیا کے دو روزہ دورے پر کوالا لمپور میں ہیں، اس موقع پر ملائیشین نائب وزیر خارجہ نے اپنے پاکستانی ہم منصب کے اعزاز میں عشائیہ تقریب کا اہتمام کیا۔

ملائشین نائب وزیرخارجہ مرزوقی یحییٰ نے شاہ محمود قریشی کا پرتپاک استقبال کیا۔ تقریب میں گفتگو کرتے ہوئے شاہ محمود قریشی نے کہا کہ پاکستان ملائشیا کے ساتھ تعلقات کو انتہائی قدر کی نگاہ سے دیکھتا ہے۔

دونوں ملکوں کے وزرائے اعظم کے دوروں نے تعلقات کو مزید تقویت دی ہے، انہوں نے کہا کہ ملائیشیا کو بھارتی دھمکیاں بالائے طاق رکھ کر کشمیر پر اصولی مؤقف اپنانے پر خراج تحسین پیش کرتا ہوں۔

دونوں رہنماؤں کے درمیان ملاقات میں پاکستان اور ملائشیا میں تعلیم، آئی ٹی، صنعت اور دوطرفہ اقتصادی و تجارتی تعاون بڑھانے پر اتفاق کیا گیا۔

اس موقع پر مسلم ممالک کو درپیش مسائل اور ان سے نمٹنے کیلئے لائحہ عمل کی ضرورت اور اسلامو فوبیا، مسلم اقلیتوں پر جبرو استبداد اور امہ کی صفوں میں اتحاد کے فقدان پر بھی گفتگو کی گئی۔

ملاقات میں نوجوانوں کی استعداد کار بڑھانے اور زراعت کے شعبہ میں باہمی تعاون بڑھانے پر اتفاق کیا گیا۔ وزیرخارجہ شاہ محمود نے پرتکلف عشائیے پر ملائیشین نائب وزیرخارجہ کا شکریہ ادا کیا۔

Comments

comments

یہ بھی پڑھیں