پترا جایا : وزیرخارجہ شاہ محمود قریشی نے کہا ہے کہ کوئی پاکستانی کارکن ملائیشیا میں جاں بحق ہوا تو اس کے خاندان کو پنشن دی جائے گی، وزیراعظم کے دورہ ملائیشیا سے دوستانہ تعلقات کو اسٹریٹیجک تعلقات میں بدلنے میں مدد ملے گی۔
یہ بات انہوں نے ملائیشیا میں میڈیا سے گفتگو کرتے ہوئے کہی۔ وزیرخارجہ نے کہا کہ وزیراعظم عمران خان کے دورہ ملائیشیا کے موقع پر دونوں ممالک کے درمیان تجارت اور دفاع کے شعبے میں تعاون بڑھانے پر بات چیت ہوئی۔
انہوں نے کہا کہ حالیہ دورہ ملائیشیا میں3معاہدوں پر دستخط ہوئے ہیں، دورے سے دوستانہ تعلقات کو اسٹریٹیجک تعلقات میں بدلنے میں مدد ملے گی۔
شاہ محمودقریشی نے بتایا کہ ملائیشیا کے ساتھ ایک معاہدہ افرادی قوت کے حقوق کے تحفظ کیلئے کیا گیا، کوئی پاکستانی ورکر ملائیشیا میں جاں بحق ہوا تو اس کے خاندان کو پنشن ملے گی، ملائیشیا میں82ہزار پاکستانی افرادی قوت مختلف شعبوں میں کام کررہی ہے۔
وزیر خارجہ کا مزید کہنا تھا کہ رواں سال ملائیشیا سے آنے والی ترسیلات زر میں 35فیصد اضافہ ہوا، ملائیشیا میں مقیم پاکستانیوں نے رواں سال 1ارب55ڈالر وطن بھجوائے، وزیراعظم نے واضح کیا پاکستان مسلم امہ کو تقسیم نہیں بلکہ متحد رکھنا چاہتا ہے۔
