نیویارک: وزیر خارجہ شاہ محمود قریشی نے کہا ہے کہ وزیراعظم نے بھارت کو آئینہ دکھایا اور حقائق سامنے رکھے ہیں، عمران خان نے اقوام متحدہ میں بھارت کے ہوش اڑا دئیے۔
تفصیلات کے مطابق وزیر خارجہ شاہ محمود قریشی نے کہا ہے کہ اگر بھارت وزیراعظم کے خطاب پر جواب دے گا تو ہم بھی جواب الجواب دیں گے، وزیراعظم نے جنرل اسمبلی میں حقائق سامنے رکھے ہیں۔
وزیر خارجہ نے کہا کہ اسلامو فوبیا سے متعلق وزیراعظم عمران خان نے کھل کر بات کی ہے جبکہ او آئی سی کے آئندہ کے لائحہ عمل پر سعودی وزیر خارجہ عادل الجبیر سے مذاکرات ہوئے ہیں۔
مزید پڑھیں: اقوام متحدہ دو نیوکلیئر طاقتوں کے آمنے سامنے آنے سے پہلے اپنا کردار ادا کرے، وزیراعظم
شاہ محمود قریشی نے کہا کہ پاکستان پہنچ کر مظفرآباد اور آزاد کشمیر جائیں گے۔
وزیر خارجہ شاہ محمود قریشی اقوام متحدہ کے باہر احتجاجی مظاہرے میں پہنچے اور مظاہرین سے خطاب کرتے ہوئے کہا کہ وزیراعظم عمران خان نے اقوام متحدہ میں کشمیریوں کا مقدمہ پیش کیا۔
شاہ محمود قریشی نے کہا کہ عمران خان نے اقوام متحدہ میں بھارت کے ہوش اڑا دئیے، انہوں نے مظاہرین کا شکریہ بھی ادا کیا۔
یاد رہے کہ وزیراعظم عمران خان کا7روزہ دورہ امریکا (مشن کشمیر) کامیابی سے مکمل ہوگیا ہے، وزیراعظم عمران خان کچھ دیر بعد وطن واپسی کیلئے ایئرپورٹ کیلئے روانہ ہوں گے۔
