The news is by your side.

Advertisement

’حکومت کرونا وبا کے معاشی مضمرات سے نمٹنے کیلئے ہر ممکن کوشش کررہی ہے‘

اسلام آباد: وزیر خارجہ شاہ محمود قریشی کا کہنا ہے کہ حکومت کرونا وبا کے معاشی مضمرات سے نمٹنے کے لیے ہر ممکن کوشش کررہی ہے۔

تفصیلات کے مطابق معاون خصوصی زلفی بخاری، معید یوسف نے وزیر خارجہ شاہ محمود قریشی سے ملاقات کی جس میں عالمی وبا، بیرون ملک مقیم پاکستانیوں کی واپسی کے لیے کاوشوں پر تفصیلی تبادلہ خیال کیا گیا۔

معاونین خصوصی نے ہم وطنوں کی واپسی کے لیے وزیر خارجہ کی شبانہ روز کاوشوں کو سراہا۔

وزیر خارجہ شاہ محمود قریشی نے کہا کہ کرونا روک تھام کے لیے ایئرپورٹس پر وضع کردہ ایس اوپیز پر عملدرآمد جاری ہے، مقامی سطح پر پھیلاؤ کو روکنے کے لیے آئندہ دنوں میں مزید احتیاط کو ملحوظ خاطر رکھنا ہوگا۔

شاہ محمود قریشی نے کہا کہ بیرون ملک سے پاکستانیوں کی واپسی کا تیسرا مرحلہ کامیابی سے جاری ہے، آج تک مختلف ممالک سے 12 ہزار پاکستانی وطن واپس لائے جاچکے ہیں۔

مزید پڑھیں: پاکستانیوں کی مرحلہ وار واپسی کے لیے تمام وسائل بروئےکار لا رہے ہیں،وزیرخارجہ

انہوں نے کہا کہ وطن واپسی کے منتظر پاکستانیوں کی تعداد میں روز بروز اضافہ ہورہا ہے، اب تک 63 ہزار کے قریب پاکستانی ہمارے پاس رجسٹرڈ ہوچکے ہیں۔

وزیر خارجہ نے کہا کہ تیسرے مرحلے میں ہفتہ وار 7 ہزار پاکستانیوں کو لانے کی کوشش ہے، صوبوں کے تعاون کے ساتھ ہماری استعداد کار میں مزید اضافہ ہوچکا ہے۔

واضح رہے کہ اس سے قبل وزیر خارجہ شاہ محمود قریشی نے وزارت خارجہ میں قائم ایمرجنسی کرائسز مینجمنٹ یونٹ کا دورہ کیا تھا۔ وزیرخارجہ کو ڈی جی ایمرجنسی کرائسز مینجمنٹ یونٹ کی جانب سے بریفنگ دی گئی تھی۔

Comments

یہ بھی پڑھیں