اسلام آباد: وزیر خارجہ شاہ محمود قریشی کا کہنا ہے 8 اکتوبر کے المناک حادثے نے قوم کو یکجا کیا، افسوس ہے کہ حکومتوں نے متاثرین کی آباد کاری میں سرگرمی نہ دکھائی۔
تفصیلات کے مطابق وزیر خارجہ شاہ محمود قریشی نے زلزلہ متاثرین کے ساتھ ہمدردی اور یکجہتی کا اظہار کرتے ہوئے کہا کہ 8 اکتوبر کے قیامت خیز زلزلے کو 13 برس بیت گئے، اس قدرتی آفت کی تلخ یادیں آج بھی زندہ ہیں۔
انہوں نے کہا کہ 8 اکتوبر کا زلزلہ ایک غیر معمولی قدرتی آفت بن کر آیا، شمالی علاقہ جات خصوصاً آزاد کشمیر میں المناک مناظر دیکھنے میں آئے، ’ہم سے جدا ہونے والوں کی یادیں آج بھی ہمیں مغموم کرتی ہیں‘۔
وزیر خارجہ کا کہنا تھا کہ 8 اکتوبر کے المناک حادثے نے قوم کو یکجا کیا، قوم تکالیف بھلا کر قدرتی آفت میں گھرے بھائیوں کی مدد کو نکلی۔ افسوس ہے کہ حکومتوں نے متاثرین کی آباد کاری میں سرگرمی نہ دکھائی۔
انہوں نے کہا کہ تحریک انصاف حکومت نے قوم کی قوت مدافعت بڑھانے کا بیڑہ اٹھایا ہے۔ جنگلات کا تحفظ اور شجر کاری قدرتی آفات کے خلاف مدافعت کی کوشش ہے۔ حکومت قوم کو قدرتی آفات سے بچانے کے لیے مزید اقدامات کو ترجیح دے گی۔
خیال رہے کہ آج 8 اکتوبر 2005 کو آزاد کشمیر اورخیبر پختونخواہ میں آنے والے تباہ کن زلزلے کو 13 برس بیت گئے۔ اس اندوہناک سانحے میں 80 ہزار سے زائد افراد جاں بحق ہوئے جبکہ قیامت صغریٰ میں بلند و بالا عمارتیں مٹی کے ڈھیر میں تبدیل ہوگئیں۔
