تحریک انصاف کے خوف سے اسٹیٹس کو کا ٹولہ یکجا ہوگیا ہے: شاہ محمود قریشی -
The news is by your side.

Advertisement

تحریک انصاف کے خوف سے اسٹیٹس کو کا ٹولہ یکجا ہوگیا ہے: شاہ محمود قریشی

اسلام آباد: پاکستان تحریک انصاف کے رہنما شاہ محمود قریشی کا کہنا ہے کہ وزیر اعظم عمران خان کے ساتھ مل کر نیا پاکستان بنانا ہے۔ تحریک انصاف کے خوف سے اسٹیٹس کو کا ٹولہ یکجا ہوگیا ہے۔

تفصیلات کے مطابق تحریک انصاف کے رہنما شاہ محمود قریشی نے پارلیمانی پارٹی کے اجلاس کے بعد میڈیا سے گفتگو کرتے ہوئے بتایا کہ آج پاکستان تحریک انصاف کی پارلیمانی پارٹی کا پہلا اجلاس تھا، عمران خان نے نو منتخب ممبران کو مبارک باد پیش کی۔

انہوں نے کہا کہ تحریک انصاف آج سب سے بڑی جماعت ثابت ہوئی ہے۔ تحریک انصاف نے 1 کروڑ 68 لاکھ ووٹ حاصل کیے۔

انہوں نے کہا کہ تحریک انصاف آج وفاق اور ہر صوبے میں موجود ہے، عددی لحاظ سے مرکز میں حکومت بنانے کے قابل ہوگئے ہیں۔ پارلیمانی پارٹی نے آج عمران خان کو اپنا پارلیمانی لیڈر منتخب کیا ہے۔

شاہ محمود قریشی نے بتایا کہ چیلنجز سے متعلق عمران خان نے آپارٹی کو اعتماد میں لیا ہے۔ تحریک انصاف ثابت کرے گی کہ ہمارا طریقہ کار مختلف تھا اور ہے۔ تحریک انصاف کے خوف سے اسٹیٹس کو کا ٹولہ یکجا ہوگیا ہے۔

انہوں نے کہا کہ عمران خان نے باور کروایا کہ یکسوئی اور یکجہتی کا مظاہرہ کرنا ہوگا۔ عمران خان نے چیلنجز سے نمٹنے کے طریقے پر روشنی ڈالی ہے۔ ’انہوں نے ٹیکس وصولی، معاشی اصلاحات کی بہتری پر روشنی ڈالی جبکہ ملک کی خارجہ پالیسی پر بھی ایک نظر دہرائی ہے‘۔

شاہ محمود نے مزید کہا کہ ہم نے فیصلے پاکستان کے مفادات کو مدنظر رکھ کر کرنے ہیں۔ ہم نے پاکستان کے مفاد اور عوام کی خواہشات کو ترجیح دینی ہے۔

انہوں نے مزید کہا کہ اسپیکر ہاؤس کو اپوزیشن کا اکھاڑا بنایا جائے گا تو پارلیمانی آداب کے برعکس ہوگا، نئے اسپیکر کے آنے تک ایاز صادق کو پارلیمانی روایات کا احترام کرنا ہے۔

اس سے قبل پارلیمانی پارٹی کے اجلاس سے خطاب کرتے ہوئے شاہ محمود قریشی نے کہا کہ آج کا دن تاریخی اہمیت کا حامل ہے۔

انہوں نے کہا کہ عمران خان کی 22 سال کی جدوجہد کا ثمر سامنے آچکا ہے۔ ’الحمد اللہ تحریک انصاف سب سے بڑی جماعت بن چکی ہے‘۔

انہوں نے کہا کہ تحریک انصاف پر اب اقتدار میں بھاری ذمہ داری عائد ہے، تحریک انصاف کی کامیابی کے بعد نئے دور کا آغاز ہوگا۔

شاہ محمود قریشی نے مزید کہا کہ وزیر اعظم عمران خان کے ساتھ مل کر نیا پاکستان بنانا ہے۔

خیال رہے کہ اسلام آباد کے نجی ہوٹل میں منعقد ہونے والی پاکستان تحریک انصاف کی پارلیمانی پارٹی کے اجلاس میں باقاعدہ طور پر عمران خان کو آئندہ وزیر اعظم نامزد کردیا گیا۔

اجلاس میں تحریک انصاف اور اتحادی جماعت کے رہنماؤں اور کارکنان نے شرکت کی۔

دوسری جانب تحریک انصاف کو قومی اسمبلی میں اکثریتی ارکان کی حمایت حاصل ہوگئی ہے۔ آزاد ارکان کی شمولیت سے تحریک انصاف کی قومی اسمبلی میں نشستوں کی تعداد 125 ہوگئی ہے۔


Comments

comments

یہ بھی پڑھیں