تازہ ترین

پلواما حملہ : بھارت الیکشن کی آڑ میں مس ایڈونچر کررہا ہے، شاہ محمود قریشی

میونخ : وزیرخارجہ شاہ محمود قریشی نے کہا ہے کہ الیکشن کی آڑ میں بھارت کوئی نہ کوئی مس ایڈونچر کررہا ہے، پلواما واقعے پر ان کے پاس کوئی ثبوت ہیں تو ہمیں دیں، واقعے کی مذمت کرتے ہیں۔

ان خیالات کا اظہار انہوں نے اے آر وائی نیوز کے پروگرام سوال یہ ہے میں میزبان ماریہ میمن سے خصوصی گفتگو کرتے ہوئے کیا۔ شاہ محمود قریشی نے کہا کہ بھارت اس سے پہلے بھی پاکستان پرالزامات لگاتا رہا ہے یہ کوئی نئی بات نہیں، پاکستان کو دباؤ میں لانے کی بھارتی کوشش کامیاب نہیں ہوگی اور اس کے پروپیگنڈے کو دنیا بھی نہیں مانے گی۔

ایک سوال کے جواب میں ان کا کہنا تھا کہ مقبوضہ کشمیرمیں ظلم ہورہا ہے جس کے ردعمل میں ایسے حملے ہورہے ہیں، خود کش حملہ آور کے گاؤں میں20شہادتیں ہوئی ہیں، پلوامہ کا واقعہ افسوسناک تھا اس کی مذمت کرتے ہیں، ہم مذاکرات کےذریعےامن چاہتے ہیں لیکن بھارت بات چیت کیلئے ہچکچاہٹ کا شکار ہے۔

شاہ محمود قریشی کا مزید کہنا تھا کہ الیکشن کی آڑ میں بھارت کوئی نہ کوئی مس ایڈونچر کررہا ہے اور بلاوجہ ٹینشن کو ہوا دے کر معاملات خراب کررہا ہے پاکستان نہیں، پاکستان کو دباؤ میں لانے کی بھارتی کوشش کامیاب نہیں ہوگی، بھارت کے پاس کوئی ثبوت ہیں ہمیں دیں۔

Comments

- Advertisement -