اٹک / سرگودھا / رحیم یار خان : پی ٹی آئی کے وائس چیئرمین شاہ محمود قریشی اور فیاض چوہان سمیت 6 رہنماؤں کو جیل سے رہا کردیا گیا۔ اس موقع پر مقامی رہنماؤں اور کارکنوں نے پھولوں کی پتیاں نچھاورکیں۔
رحیم یارخان جیل سے اعظم سواتی کو ہائی کورٹ کے حکم کے باوجود رہا نہ کرنے پر کارکنان نے احتجاج کیا، پی ٹی آئی کارکنان ہائی کورٹ کا آرڈر لے کر ڈسٹرکٹ جیل کے باہر موجود رہے۔
سرگودھا میں شاہ پورجیل سے فیاض چوہان سمیت گرفتار6رہنما رہا کردیے گئے، تمام رہا ہونے والے رہنما راولپنڈی روانہ ہوگئے، رہا ہونے والےرہنماؤں کا پرجوش استقبال کیا گیا اور ہار پہنائے گئے۔
اٹک ڈسٹرکٹ جیل کے باہر پی ٹی آئی کارکنوں کی کثیر تعداد موجود تھی جنہوں نے شاہ محمود قریشی کی آمد پر خوب نعرے بازی کی۔ شاہ محمود قریشی کو لاہور کوٹ لکھپت جیل سے اٹک جیل منتقل کیا گیا تھا، جیل کے باہر شاہ محمود قریشی کے صاحبزادے زین قریشی، صاحبزادی مہربانو قریشی، طاہرصادق، سید یاور بخاری ودیگر موجود تھے۔
خیال رہے کہ پی ٹی آئی چیئرمین عمران خان کے اعلان کے بعد 22فروری کو جیل بھرو تحریک کے پہلے روز پی ٹی آئی کے وائس چیئرمین شاہ محمود قریشی اور سیکریٹری جنرل اسد عمر سمیت دیگر سینئر قیادت ’جیل بھرو تحریک‘ کے تحت گرفتار کیا گیا تھا، بعد ازاں انہیں صوبے کی دیگر جیلوں میں منتقل کیا گیا تھا۔
رہنماؤں کی گرفتاری کے بعد فواد چوہدری کے ساتھ ساتھ پی ٹی آئی کے سینیٹر اعجاز چوہدری اور دیگر کی جانب سے بھی پی ٹی آئی رہنماؤں کی رہائی کے لیے لاہور ہائی کورٹ میں درخواست دائر کی گئی تھی۔
